मोबाइल नेटवर्कको भ्वाइस कलमा पछिल्लो वर्ष अत्याधिक कल ड्रपको समस्या (कुरा गर्दा गर्दै बिचैमा काटिने समस्या) देखिन सुरु भएपछि भारतीय दूरसञ्चार क्षेत्रमा अहिले वाईफाई कलिङ चल्तीको विकल्प बनेको छ । भारतीय दूरसञ्चार कम्पनी एयरटेलले हाल यो सेवालाई देशका केही भागहरुमा सुरु गरिसकेको छ भने अर्को दूरसञ्चार कम्पनी रियलाइन्स जियोले पनि यो सेवा परिक्षण गरिरहेको र चाँडै थाल्ने तयारीमा छ ।
एयरटेलले यो सेवा यही डिसेम्बरको सुरुवातमै सार्वजनिक गरेको हो । राजधानी प्रदेश दिल्लीका प्रयोगकर्ताका लागि सार्वजनिक गरेको थियो यो सेवा उसले मुम्बई, कलकत्ता, आन्द्र प्रदेश, कर्नाटक र तमिलनाडुमा विस्तार गरिसकेको छ । कम्पनीले यो सेवा क्रमशः देशका अन्य भागमा समेत विस्तार गरिने जनाएको छ ।
हाल एयरटेलको वाईफाई कलिङ केही निश्चित स्मार्टफोनहरुले मात्र सपोर्ट गर्छ । एयरटेलको यो सेवा अहिले एयरटेलमाकै ‘एक्सस्ट्रिम फाइबर होम’ ब्रोडब्याण्डमा मात्र काम गर्ने किसिमको छ । टेलिकम टक वेभसाइटको अनुसार रियलाइन्स जियोले पनि यो सेवा सुरु गर्न परीक्षण थालसिकेको छ ।
उसले कर्नाटक, कलकत्ता, महाराष्ट्रमा यसको परिक्षण थालेको बताइएको छ । तर जियोको सेवा भने सबै किसिमको ब्रोडब्याण्डसँग कम्प्याटेबल (चल्नसक्ने किसिमको) हुनेछ । जियोले चाँडै सेवा सार्वजनिक गर्ने अपेक्षा गरिएको छ ।
के वाईफाई कलिङ ?
वाईफाई कलिङ प्रविधि भनेको मोबाइल नेटवर्क नभएको ठाउँमा वाईफार्ईको सहायताले भ्वाइस कल गर्ने प्रविधि हो । यो सामान्य कलजस्तै हुन्छ तर मोबाइल नेटवर्कको ठाउँमा वाईफाई नेटवर्क प्रयोग हुन्छ ।
मोबाइल नेटवर्कमा कल ड्रपको समस्या पछिल्लो केही वर्षमा नाटकीय रुपमा बढेपछि यस किसिमको समस्यालाई हल गर्न दूरसञ्चार कम्पनीहरुले विकल्पमा वाईफाई कलिङ प्रविधिमा लागेका हुन् । मोबाइल नेटवर्कले काम नगर्दा पनि वाईफाई कलिङले राम्रो गुणस्तरको स्मुथ भ्वाइस कल गर्ने सहजता प्रयोगकर्ताहरुले पाउँछन् ।
तर वाईफाई कलिङका लागि उच्च गतिको नेटवर्क कनेक्सन भने आवश्यकता पर्छ यसले प्रयोगकर्तालाई एचडी भ्वाइस कलको अनुभव दिन्छ । ह्वाट्सएप कल जसरी नै काम गर्छ, तर त्यसका लागि प्रयोगकर्ताले छुट्टै एप्लिकेसन इन्सटल गर्न भने पर्दैन ।
यो सेवाका लागि एकदमै कम इन्टरनेट खपत हुन्छ । वाईफाई कलिङ सेवा सञ्चालन गरिहेको कम्पनीले व्यवस्था गरेको फिचर्ससँग प्रयोगकर्ताको स्मार्टफोन मिल्नुपर्छ र प्रयोगकर्ताले वाईफाई कलिङलाई सपोर्ट गर्ने फोनको ओपरेटिङ सफ्टवेयरलाई अपग्रेड गर्न पर्छ ।
त्यसपछि प्रयोगकर्ताले वाईफाई कलिङ अप्सनलाई अन गर्नुपर्छ । अझ उच्च गुणस्तर अनुभवका लागि प्रयोगकर्ताले भीओएलटीई अप्सनलाई अन गरिरहनुपर्छ ।