ट्रम्प प्रशासनको प्रतिबन्ध विरुद्ध सघाएको भन्दै विश्वकै ठूलो दूरसञ्चार उपकरण निर्माता हुवावेले आफ्ना कर्मचारीलाई ३२ अर्ब ६० करोड रुपैयाँ बोनस दिने भएको छ । अर्थात हुवावेका कर्मचारीले अक्टोबर महिनाको तलब नियमित पाइरहेको भन्दा दोब्बर पाउनेछन् ।
गत मे मा अमेरिकाले सुरक्षा चुनौति देखिएको भन्दै चिनियाँ कम्पनी हुवावेका स्मार्टफोनमा गुगलको एन्ड्रोइड अपरेटिङ सिष्टम प्रयोगमा प्रतिबन्ध लगाउने निर्णय गरेको थियो । आफ्नो देशको महत्वपूर्ण सूचनाको सुराकीको आरोप अमेरिकाले यो कम्पनी माथी लगाएको थियो । यद्यपि हुवावेले सुरुवाती चरणदेखि उक्त आरोपको खन्डन गर्दै आएको छ ।
हाल हुवावेमा एक लाख ९० हजार कर्मचारी कार्यरत छन् । कम्पनीले अमेरिकाको प्रतिबन्धको असर कम गर्न खटिएका अनुसन्धान तथा विकास तर्फका कर्मचारीलाई यस्तो बोनस दिने घोषणा गरेको हो ।
आफ्ना कर्मचारीलाई हुवावेले नगद प्रोत्साहन दिएका पहिलो पटक भने होइन । यद्यपि कम्पनीकै कुनै एउटा समुहलाई यति ठूलो रकम बोनसका रुपमा दिएको भने पहिलो पटक नै हो । उक्त समुहले अमेरिकासँगको निर्भरता हटाउन मात्र सहयोग गरेन कम्पनीको छुट्टै हार्मोनी अपरेटिङ सिष्टम समेत बनाएर प्रतिकारमा उभिन सहयोग पुर्याएको थियो ।
कम्पनीको यस बर्षको कारोबार थप राम्रो भएकोले छिटै नै बोनस वितरण गर्न सम्भव भएको कम्पनीको लेखा शाखामा कार्यरत एक कर्मचारीले बताएका छन् । अमेरिकाको प्रतिबन्धका बाबजुद कम्पनीको पहिलो त्रैमासिक आम्दानी २७ प्रतिशतले बढेको जनाइएको छ ।