काठमाडौं । स्मार्टफोनको आयु छोटो हुन्छ र बजार मूल्य पनि क्रमशः कम हुँदै जान्छ । मूल्य अवमूल्यन हुँदै जानु स्मार्टफोन संस्कृतिको एउटा नियम नै हो ।
तर एउटा सेलफोन ट्रेड-ईन साइट बैंकमाईसेल निकालेको प्रतिवेदनले एन्ड्रोइड फोनको तुलनामा आईफोनको भ्याल्यू लामो समय रहने देखाएको छ ।
उक्त रिपोर्टले तीन सय जति फोनको रिसेल भ्याल्यू ट्र्याक गरेको थियो । पक्कै पनि यो नतिजा एन्ड्रोइड फोन प्रयोगकर्ताका लागि भने दुखद छ ।
पहिलो वर्ष आईफोनको मूल्यमा २३.४५ प्रतिशतले गिरावट आएको थियो भने दोस्रो वर्षमा सुरुवाती मूल्यदेखि ४५.४६ प्रतिशतले घटेको थियो ।
यो हेर्दा वा सुन्दा निकै ठूलो गिरावट लाग्न सक्छ । सात सय डलरभन्दा माथिको फ्ल्यागशिप एन्ड्रोइड फोनको तुलनामा यो केही पनि होइन भन्दा फरक पर्दैन ।
पहिलो वर्ष ती फोनले ४५.१८ प्रतिशतले मूल्य गुमाएका थिए भने दोस्रो वर्ष ७१.४१ प्रतिशले अवमूल्यन भएको थियो । वास्तवमा यस्तो मूल्य अवमूल्यन एन्ड्रोइडको हाई एण्ड फोनको मात्र दुर्दशा भने होइन ।
बैंकमाईसेलको रिपोर्ट अनुसार विगत दुई वर्षमा सार्वजनिक भएका ३५० डलर मूल्यसम्मका एन्ड्रोइड फोन वा त्यसभन्दा मूनि मूल्य भएका फोनले पनि एक वर्षभित्रमै आधाभन्दा धेरै मूल्य गुमाएका थिए ।
२०१९ देखि २०२० को बीचमा सामसङ, मोटोरोला, एलजी, एचटीसी र गूगल लगायतका स्मार्टफोन ब्राण्डहरुले पहिलो वर्षमै आफ्नो व्यापार मूल्यभन्दा औषतमा ४८.६५ प्रतिशत अवमूल्यन व्यहाेर्नु पर्यो ।
रिपोर्टअनुसार आईफोन एक्सआरले २०१९ भर आफ्नो मूल्य २१.५५ प्रतिशतले मात्रै गुमाएको थियो भने ग्यालेक्सी एस टेन ईले केवल ९ महिनामै ३७.९८ प्रतिशतले मूल्य गिरावट सहनु पर्यो ।
यस्तै आईफोन एक्सएसले २०१९ मा २३.३१ प्रतिशतले मूल्य गुमाएको थियो भने ग्यालेक्सी एस टेनले ९ महिनामै ४३.७८ प्रतिशतले मूल्य गुमायो ।
यस्तै आईफोन एक्सएस म्याक्सले २०१९ मा २५.५१ प्रतिशतले मूल्य गुमाएको थियो भने ग्यालेक्सी एस टेन प्लसले ९ महिनामै ४५.२६ प्रतिशतले मूल्य गुमायो ।
एन्ड्रोइड डिभाइसको कुरा गर्दा यो दुर्दशाबाट गुज्रिने कम्पनी सामसङ मात्र होइन मोटोरोला, एलजी र गूगलका स्मार्टफोनहरुको पनि अवस्था यस्तै छ ।
मोटोरोलाले २०१९ को जनवरीदेखि डिसेम्बरसम्म औषत ५९.४१ प्रतिशतले मूल्य गुमाएको छ । यस्तै मोटोरोला वान २०१८ ले सबैभन्दा धेरै र सबैभन्दा छिटो मूल्य गुमायो । जुन ७५.८४ प्रतिशत रहेको छ ।
यस्तै एलजीको २०१९ को जनवरीदेखि डिसेम्बरसम्मको अवधिमा औषत ५६.७६ प्रतिशतले मूल्य अवमूल्यन भयो । २०१५ को नेक्सस फाइभ एक्स उसको सबैभन्दा छिटो मूल्य गिरावट हुने डिभाइस बन्यो । जसको मूल्य ७०.५९ प्रतिशतले घटेको थियो ।
यस्तै २०१७ मा भी ३० ले सबैभन्दा धेरै मूल्य गुमाएको थियो जुन १४५ डलर रहेको थियो । गूगले सोही अवधिमा ५१.६८ प्रतिशतले मूल्य गुमायो ।
२०१८ मा पिक्सेल थ्रीले सबैभन्दा धेरै र छिटो मूल्य गुमायो, जुन ५६.७० प्रतिशत रहेको थियो । रिसेल गर्ने उद्देश्यले मोबाइल खरिद गर्दै हुनुहुन्छ भने तपाईं एन्ड्रोइडको साटो आईफोन नै खरिद गर्नुहोस् ।