काठमाडौं । स्मार्ट टेलिकमले नियामक नेपाल दूरसञ्चार प्राधिकरणको निर्देशन अनुसार रिचार्ज बराबर बोनस सेवा अझै सुरु गरेको छैन । यसअघि मंगलबार नियामक नेपाल दूरसञ्चार प्राधिकरणले रिचार्ज गरे बराबरको रकम बोनसको रुपमा उपलब्ध गराउन सबै सेवा प्रदायकलाई निर्देशन दिएको थियो ।
निर्देशनको पालना गर्दै नेपाल टेलिकमले बुधबार रातीदेखि रिचार्जमा शतप्रतिशत बोनस दिन थालेको छ भने एनसेलले आधा बोनस उपलब्ध गराइरहेको छ । तर, अर्को सेवा प्रदायक स्मार्ट टेलिकमले भने हालसम्म त्यस्तो कुनै योजना सार्वजनिक गरेको छैन ।
प्राधिकरणले मुलुक नै लकडाउनको अवस्थाबाट गुज्रिरहेका बेला प्रयोगकर्ताको सहजताको लागि सेवा प्रदायकलाई यस्तो सुविधा उपलब्ध गराउन निर्देशन दिएको थियो । उसले दुई सय रुपैयाँ सापटी दिन नियामकले दिएको अर्को निर्देशनको समेत पुर्ण पालना गरेको छैन । स्मार्टले लोनको रुपमा केवल ४० रुपैयाँ मात्रै दिइरहेको छ ।