टप फाइभ इन्टरनेट कम्पनीः ग्राहक बृद्धिमा वर्ल्डलिंक अगाडि, पुछारमा टेलिकम

काठमाडौं । मुलुककै सबैभन्दा ठूलो इन्टरनेट सेवाप्रदाय कम्पनीको रुपमा रहेको वर्ल्डलिंक  ग्राहक वृद्धिमा समेत सबैभन्दा अगाडि देखिएको छ । विगत एक वर्षको अवधिमा कम्पनीले ९६ हजार ८३७ नयाँ कनेक्सन जोड्न सफल देखिएको हो ।

नियामक नेपाल दूरसञ्चार प्राधिकरणले भर्खरै प्रकाशित गरेको प्रतिवेदन अनुसार गएको पुस मसान्तसम्ममा वर्ल्डलिंकले आफ्नो कूल ग्राहक संख्या तीन लाख ६३ हजार ५७२ पुर्‍याएको छ ।

तर इन्टरनेट सेवामा दोश्रो ठूलो कम्पनीको रुपमा रहेकाे नेपाल टेलिकम भने नयाँ ग्राहक बनाउने मामिलामा पुछारमा देखिएको छ । मूख्य पाँच कम्पनीमा टेलिकमले गएको एक वर्षमा सबैभन्दा थोरै अर्थात २९ हजार ७० वटा मात्रै नयाँ ग्राहक बनाउन सकेको हो ।

इन्टरनेट सेवाप्रदायक	२०७५ पुससम्म	नयाँ कनेक्सन	हालसम्मको कूल
वर्ल्डलिंक	२६६,७३५	९६८३७	३६३,५७२
नेपाल टेलिकम	२१०१८८	२९०७०	२३९,२५८
सुबिसु	६३,९५८	३८०१५	१०१,९७३
भायनेट	६२,३४८	३२८७०	९५,२१८
क्लासिक टेक	४४,१९३	३७३२२	८१,५१५
	इन्टरनेट कनेक्सन

नयाँ ग्राहक थप्ने मामिलामा सुबिसु केबल नेट प्राली दोश्रो स्थानमा छ । तेश्रो ठूलो इन्टरनेट सेवाप्रदायक कम्पनीकाे रुपमा रहेको सुबिसुले एकै वर्षमा ३८ हजार १५ नयाँ कनेक्सन जोड्न सफल भएको छ । हाल उसको कुल ग्राहक संख्या एक लाख एक हजार ९७३ पुगेको छ । 

यसैगरी क्लासिक टेक तेस्रो धेरै ग्राहक बृद्धि गर्ने इन्टरनेट सेवाप्रदायकको रुपमा देखा परेको छ । उसले एक वर्षको अवधिमा झन्डै दोब्बर (३७ हजार ३२२) नयाँ कनेक्सन कायम गर्दै कूल ग्राहक संख्या ८१ हजार ५१५ पुर्‍याएको छ ।

त्यस्तै अर्को इन्टरनेट सेवाप्रदायक कम्पनी भायनेटले ३२ हजार ८७० नयाँ ग्राहकका साथ आफ्नो कूल ग्राहक आधार ९५ हजार २१८ पुर्‍याउन सफल देखिएको छ । 

हालसम्म इन्टरनेट तथा ईमेल सेवाका लागि १२५ अनुमतिपत्र जारी भएकोमा नियामकले भने केवल ३९ सेवाप्रदायकको मात्रै ग्राहक विवरण संकलन गरेको छ ।

जसअनुसार हालसम्म (पुस मसान्तसम्म) कूल कूल इन्टरनेट कनेक्सन लाइन १० लाख १९ हजार ३२८ पुगेको छ । जसअनुसार प्रति कनेक्सन एक घर परिवारको आधारमा करीब ५० लाख जनसंख्यामा फिक्स्ड लाइन इन्टरनेटको पहुँच पुगेको देखिन्छ । 

पछिल्लो अध्यावधिक: असोज २, २०७९ २२:३४

टिप्पणीहरू