काठमाडौं । स्टार्टअप कम्पनी अर्बन गर्ल्सले आफ्नो ईकमर्स प्लेटफर्मलाई सोसल ईकमर्स प्लेटफर्मको रुपमा अपग्रेड गरेको छ । कम्पनीले नेपालमै ‘पहिलो पटक’ सोसल ईकमर्सको रुपमा आफ्नो मोबाइल एप र बेव एपको बेटा भर्सनको परीक्षण थालेको हो ।
यूजीले हाल सातवटा नयाँ फिचरमा काम गरिरहेको छ । जुन कम्पनीको एपको नयाँ लोगोमा समेत देख्न सकिन्छ । गरगहनाको बिक्रीबाट सुरु भएको यूजीको अनलाइन व्यापार मेकअप, घर सजावटका सामग्रीहुँदै केक डलिभरीसम्मको सेवा दिँदै आइरहेको छ ।
सन् २०१६ मा आफ्नै केक फ्याक्ट्री स्थापना गर्न सफल यो कम्पनीले अहिले आफ्नो प्लेटफर्ममा थप छ वटा नयाँ सेवाहरु इन्टिग्रेट गरेको हो ।
‘यूजी बजारमा अहिले छ वटा नयाँ सर्भिस फिचरहरु थप गरेका छौं,’ कम्पनीका सहसंस्थापक तथा सीटीओ किरण तिमसिनाले भने, ‘अहिले हाम्रो एप गूगल प्ले स्टोरको प्रारम्भिक चरणमा छ । एप र वेब दुवैमा सबै फिचर समान रुपमा काम गर्ने छन् ।’
सोसल ईकमर्स यूजीमा यस्ता छन्, फिचरः
अटोमोबाइल
यूजी बजारले थप गरेको पहिलो सर्भिस फिचर हो, अटोमोबाइल। गत वर्षदेखि नै यो फिचरको विकास गर्न थालिएको तिमसिनाले बताए । यसमा ब्राण्ड कम्पनीले अटोमोबिल लिस्टिङ गर्न तथा प्रयोगकर्ताले त्यसै आधारमा बूकिङ गर्न सक्नेछन् ।
साथै सेवाग्राहीहरुले आफूले चलाएको अटोमोबाइलको फोटो एप ग्यालरीमा अपलोड गर्न तथा रिभ्यू गर्न सक्नेछन् । प्रयोगकर्ताले आफूले चाहेअनुसार अटोमोबाइलहरुको दायरा र आवश्यकता खुलाएर सर्च गर्न सक्छन् ।
यही मोड्युलमा भएको अटोमोबाइल फाइण्डर अप्सनले प्रयोगकर्तालाई उपयुक्त अटोमोबाइल सिफारिस गर्नेछ । त्यसैका आधारमा प्रयोगकर्ताले अटोमोबाइल सर्च गरेर बिक्रेता कम्पनीलाई अनुरोध पठाउन सक्छन् ।
एचआर मोड्युल
यो मोड्युल अहिले आन्तरिक परीक्षणकै क्रममा छ । यो एउटा जब भ्याकेन्सी प्लेसमेन्ट सर्भिस (रोजगारी सम्बन्धी) फिचर हो । यसमा बुधबारदेखि इन्टरभ्यू मोडल थप गरेर परीक्षण जारी छ ।
यो मोडलमा विजनेस हाउसहरुले आफ्नो लागि आवश्यक भ्याकेन्सी लिस्टिङ गर्न सक्नेछन् । यसमा अहिले पनि केही भ्याकेन्सीहरु छन्, जुन तपाईंले यूजी बजारको वेबसाइटमा समेत देख्न सक्नुहुनेछ ।
‘हामीले आन्तरिक भ्याकेन्सी हाम्रै एचआर मोड्युलबाट पुरा गर्दै आएका थियौं । हाम्रो सिस्टम एकदमै प्रभावकारी भएकै कारण यसलाई अरुले समेत निःशूल्करुपमा प्रयोग गर्न सक्ने बनाउन खोजेका हौं’ सहसंस्थापक तिमसिनाले टेकपानालाई सुनाए ।
यसमा विजनेस हाउसहरुले आफ्नो भ्याकेन्सी क्रियट गर्न र क्यान्डिडेटहरुलाई सर्ट लिस्टिङ गर्न सक्छन् । साथै क्यान्डिडेटहरुले पनि यसबाट सोझै सीभी पठाउन सक्छन् । अनलाइन तथा अफलाइन इन्टरभ्यू, इन्टरभ्यूको नोटहरु राख्ने, त्यसलाई शेयर गर्ने र रिजल्ट प्रकाशन गर्न सकिने सुविधा पनि यसमा छ ।
कन्टेस्ट फिचर
यूजीले साढे दुई वर्षदेखि प्रयोग गर्दै आइरहेको कन्टेस्ट फिचर (प्रतिस्पर्धा गराउन सकिने) मा तीन महिनाअघि व्यापक अपडेटपछि लाइभ गरेको थियो । सुरुमा यसमा फोटो कन्टेस्ट र भिडियो कन्टेस्ट मात्र रहेको थियो ।
सामान्यतया फेसबुकबाट कन्टेस्ट गरिरहेको कम्पनीले यसलाई थप व्यावसायिक बनाउन आफ्नै वेबसाइटमा सहभागी हुने, भोटिङ तथा कमेन्ट गर्न सकिने किसिमको मोड्युलको विकास गरेको हो । यसमा साथीहरुलाई एड गरेर सामाजिक सञ्जालमा जस्तै अन्तरक्रिया गर्न सकिन्छ ।
क्वीज मोड्युल
क्वीज मोड्युल चाहिँ रमाइलो गेम जस्तै हो । कम्पनीले आन्तरिक प्रयोजनका लागि बनाएको यो मोड्युल अरुलाई समेत उपयोगी हुने विश्वासका साथ बाहिर ल्याइएको हो ।
किरण भन्छन्, ‘यहाँ ईण्ड युजरहरुले समेत क्वीज क्रियट गरेर पोस्ट गर्न सक्छन् । जसमा क्वीजलाई प्राइभेट र पब्लिक दुवै तरिकाले पोस्ट गर्न सकिन्छ ।
पब्लिक रुपमा पोस्ट गरेको क्वीज सबैले देख्न सक्छन् । तर प्राइभेटको लागि भने लिंक शेयर गर्नुपर्ने हुन्छ । यसभित्र विभिन्न किसिमको क्वीज खेल्न सकिने फिचर छ ।’
सोसल कनेक्सन
नयाँ मोड्युलको रुपमा रहेको सोसल कनेक्सनमा एउटा प्रयोगकर्ताले अर्कोलाई कनेक्सन रिक्वेस्ट (फेसबुकको फ्रेण्ड रिक्वेस्ट जस्तै) पठाएर जोडिनुपर्ने हुन्छ । कनेक्ट भइसकेपछि साथीको बर्थडे, बेसिक प्रोफाइल, बायो, आफूले बिक्री गर्न राखेको सामान, कृयट गरेका क्वीजहरु सबै अर्को प्रयोगकर्ताले हेर्न सक्छन् ।
यो फेसबुकको कनेक्सन जस्तै हो । ‘हाम्रो उद्देश्य भनेको प्रयोगकर्ताहरुलाई एकअर्कासँग जोडेर साथीभाईबीच एक क्लिकमा सोझै गिफ्ट पठाउन सक्ने बनाउनु हाे । यो फिचर एपमा सोमबारसम्म लाइभ हुने अपेक्षा गरेका छौं ।’
अफर र बिडिङ
कम्पनीले इब्बेको जस्तै मोडलका लागि अक्सन र अफर फिचर विकास गरेको हो । यसमा हरेक सेवाग्राहीहरुले आफ्नो सामान सिधै बिक्री गर्न सक्छन् । सामान बिक्री गर्न अफर र बिडिङ दुई तरिका छन् ।
बिक्रेताले कुनै सामान बिडिङ सिस्टममा राख्दा बिड मूल्य पनि बढ्दै जान्छ र त्यो निश्चित अवधिभित्र सकिन्छ । निर्धारित समय सकिएपछि उच्च मूल्य कबोल गर्ने व्यक्तिले त्यो सामान किन्न सक्छ । सबै प्रक्रिया स्वचालित रुपमा हुने भए पनि अन्तिममा कारोबार भने म्यानुअल नै हुन्छ ।
जुन ईमेल र फोन नम्बरबाट समेत नै शेयर गर्न सकिन्छ । यसआधारमा क्रेता र बिक्रेताले एक आपसमा सम्पर्क गर्नसक्छन् ।
अफर फिचर
अफर फिचर नेपालको परम्परागत बार्गेनिङ (हाटबजारमा खशी किन्दाको सौदाबाजी जस्तै) जस्तै छ । यसमा बिक्रेताले कुनै सामान बिक्रीका लागि राख्दा क्रेताले नै निश्चित मूल्य अफर गर्न सक्छन् । एपले मूल्य अफर गर्ने तीनवटा मौका दिन्छ ।
अफर चित्त बुझ्दो भयो भने बिक्रेताले म्यानुअलरुपमा स्वीकार गर्छ । अफर गर्दैगर्दा क्रेताले भन्न मन लागेको कुरा नोट गरेर पठाउन सक्छ र बिक्रेताले त्यसलाई स्वीकार गर्ने वा अस्वीकार गर्ने विकल्प रोज्न सक्छ । यो अफर सुविधा चाहिँ एक प्रयोगकर्ता र अर्को प्रयोगकर्ताबीच प्रयोग हुन्छ ।
ईकमर्स
यो यूजीको मूख्य मोड्युल हो । यसमा कम्पनीले आफ्ना सहित अरुका सामान समेत बिक्री गर्दै आइरहेको छ । यो चाहिँ कम्पनीको बिजनेस टू विजनेस मोडलमा आधारित छ । कम्पनीले मोड्युलमा समेत अपडेट जारी राखेको छ ।
अहिले तपाईंले यूजी एपमा कुनै पनि प्रडक्ट खोल्नु भयो भनें, बिक्रेताको एउटा डेडिकेटेड पेज फेला पार्न सक्नुहुन्छ । त्यहाँ बिक्रेताको आफ्नै मेनु, ब्याकग्राउण्ड, लोगो र प्रडक्ट लिस्टहरु देखिन्छ ।
यसमा बिक्रेताले ब्याक ईण्डमा बसेर सिंगो पेज नै कस्टमाइज गर्न सक्छन् । सेलर ड्यासबोर्ड आगामी सोमबारदेखि लाइभमा आउने कम्पनीले बताएको छ ।
सेलर लग ईन गरेपछि सबै कुरा कस्टमाइज गर्न सकिन्छ । आफ्नो अर्डर, मेनु सबै कुरा बिक्रेताले इच्छाअनुसार अरुभन्दा फरक र राम्रो बनाउन सक्छन् । प्रडक्टहरु सेलमा राख्नेदेखि डिस्काउन्ट कोड पनि क्रियट गर्न सकिन्छ ।
तर यो डिस्काउण्ट कोड सम्बन्धित बिक्रेताको वस्तुमा मात्र लागु हुन्छ । उदाहरणको लागि तपाईंको स्टोरमा सर्च गर्दा तपाईंको मात्र प्रडक्ट देखिनेछ ।
यी सबै फिचरमा कम्पनीले विगत दुई वर्षदेखि काम गरिरहेका थियो । तर अब भने सबै प्रडक्ट अन्तिम चरणमा पुगिसकेको किरणले बताए ।
साउन मसान्तसम्ममा यी सबै सर्भिस मोड्युल सहितको एप पूर्ण रुपमा सार्वजनिक गर्ने यूजीको योजना छ । ‘आवश्यक सबै संरचना तयार भइसकेको छ । साउन अन्तिमदेखि यसलाई पब्लिक बेटामा ल्याउँदै छौं ।’
यो एपले प्रयोगकर्तालाई धेरै प्रयोजनका लागि आपसमा जोडिने अवसर दिने कम्पनीले जनाएको छ । यूजी बजार अहिले बी टू बी (व्यवसाय-व्यवसाय), बी टू सी (व्यवसाय-ग्राहक), सी टू सी (ग्राहक-ग्राहक) जस्ता विभिन्न किसिमका मोडलहरु अपनाउने तयारीमा छ । जसले यूजीलाई अब ईकमर्स प्लेटफर्मबाट सोसल ईकमर्स प्लेटफर्ममा रुपान्तरण गर्नेछ ।
एण्ड्रोइडमा यूजीको सोसल ईकमर्स एप डाउनलोड गर्न यहाँ क्लिक गर्नुहोस् ।