काठमाडौं । चीनसँगको बढ्दो सीमा विवादबीच भारतले ह्वावे र अन्य चिनियाँ कम्पनीका उपकरणलाई आफ्नो टेलिकम नेटवर्कबाट हटाउने भएको छ । भारतको यस्तो निर्णयसँगै अमेरिकी प्रतिबन्धका कारण धराशायी बनेको टेक जाइन्ट कम्पनी ह्वावेले आफ्नो सबैभन्दा ठूलो र महत्वपूर्ण बजार गुमाउनु पर्ने भएको छ ।
तर ह्वावे र जेडटीई जस्ता चिनियाँ उपकरण आपूर्तिकर्ता कम्पनीहरुमाथि प्रतिबन्ध लगाउने विषयमा नयाँ दिल्लीले कुनै पनि औपचारिक लिखित निर्देशन जारी गरेको छैन । यस्तै प्रधामन्त्री नरेन्द्र मोदीको सरकारले पनि यस किसिमको कुनै सार्वजनिक घोषणा गरेको छैन ।
यद्यपी उद्योग कार्यकारी तथा सरकारका अधिकारीहरुले केही प्रमुख मन्त्रालयहरुले फाइभजी लगायत स्थानीय टेलिकम सेवाका लागि चिनियाँ उपकरणमाथि बन्देज लगाउने विषयमा स्पष्ट संकेत दिइसकेको बताएका छन् ।
यस्तै भारतको टेलिकम विभागका कार्यकारी अधिकारीले समेत चिनियाँ भेण्डरसँग फाइभजीको परीक्षणका लागि यसअघि नै प्रतिबन्ध लगाई सकिएको बताएका छन् । भारतका लागि ह्वावे सबैभन्दा ठूलो टेलिकम उपकरण आपूर्तिकर्ता कम्पनी हो ।
यस्तै भारत विश्वको दोस्रो ठूलो मोबाइल बजार हो । भारतीय टेलिकम कम्पनी एयरटेल, भोडाफोन र सरकारी कम्पनी बीएसएनएलसँग ह्वावेको बलियो कन्ट्रयाक्ट छ ।
तर मोदी प्रशासन केही संवेदनशील पूर्वाधारमा भारतीय लगानीको विषयलाई लिएर निकै चिन्तित रहेको अधिकारीहरुले बताएका छन् ।