काठमाडौं । ट्वीटरमा धेरै चर्चामा रहेको विषय ट्रेन्डिङमा रहने गर्छ । तर, कतिपय अवस्थामा उक्त विषय किन ट्रेन्डिङमा पर्यो, त्यस पछाडिको यथार्थ कतिपय प्रयोगकर्ताले बुझ्न सकेका हुँदैनन् ।
अब ट्वीटरले आफ्ना प्रयोगकर्तालाई कुनै पनि विषय किन ट्रेन्डिङमा छ भनी जानकारी दिन सुरु गरेको छ । यसअघि ट्रेन्डिङको टपिक मात्रै देखाउने गरेकोमा अब प्रयोगकर्ताले टेन्डिङ वर्डका साथै त्यसको कारण समेत सँगै देख्न सकिने भएको छ ।
यो सुविधा हाल अर्जेन्टिना, अस्ट्रेलिया, ब्राजिल, क्यानडा, कोलम्बिया, इजिप्ट, फ्रान्स, भारत, आयरल्याण्ड, जापान, मेक्सिको, न्युजिल्याण्ड, साउदी अरेबिया, स्पेन, बेलायत, युएई र अमेरिकामा लागि दिइएकाे छ ।
उल्लेखित देशमा रहेका ट्वीटर प्रयोगकर्ताले यो सुविधा एन्ड्रोइड र आईओएस दुवै प्लेटफर्ममा प्रयोग गर्न पाउनेछन् ।
चाँडै यो सुविधा वेब भर्सनमा समेत उपलब्ध हुने कम्पनीले जनाएको छ । कम्पनीका अनुसार यो सुविधा चाँडै नै विश्वव्यापी रुपमा लागू गरिने छ ।