काठमाडौं । रेडियो फ्रिक्वेन्सीबापत सरकारले गत आर्थिक वर्ष २०७६/७७ मा तीन अर्ब ८७ करोड ६३ लाख पाँच हजार ६०१ रुपैयाँ राजस्व प्राप्त गरेको छ । विभिन्न दूरसञ्चार सेवा प्रदायक तथा कम्पनीले गत वर्षमा फ्रिक्वेन्सी दस्तुर तथा थप दस्तुर गरी उक्त राजस्व बुझाएका हुन् ।
नियामक नेपाल दूरसञ्चार प्राधिकरणका अनुसार सबैभन्दा बढी दस्तुर बुझाउनेमा सरकारी दूरसञ्चार कम्पनी नेपाल टेलिकम रहेको छ । टेलिकमले एक अर्ब ७२ करोड ४९ लाख ९० हजार रुपैयाँभन्दा बढी फ्रिक्वेन्सी दस्तुर तिरेको छ ।
त्यस्तै फ्रिक्वेन्सीका लागि दोस्रो धेरै दस्तुर बुझाउनेमा निजी मोबाइल सेवा प्रदायक कम्पनी एनसेल रहेको छ । कम्पनीले गत आर्थिक वर्षमा एक अर्ब ५९ करोड ९१ लाख ३१ हजार रुपैयाँभन्दा बढी बुझाएको छ ।