काठमाडौं । चिप र मोबाइलको माग बढ्दा सन् २०२१ को त्रैमासिकमा सामसङको नाफा २६ प्रतिशतले बढेको छ । यो अवधिमा सामसङको आम्दानी पनि १० प्रतिशतले बढेको छ ।
दक्षिण कोरियाली प्रविधि कम्पनी सामसङले सन् २०२१ को तेस्रो त्रैमासिकमा ६१ अर्ब १० करोड अमेरिकी डलर आम्दानी गरेको हो । यो गत वर्षको सोही अवधिको भन्दा १० प्रतिशतले बढी हो ।
यो वर्षको तेस्रो त्रैमासिकमा सामसङले १३ अर्ब ५० करोड अमेरिकी डलर नाफा गरेको छ । यो गत वर्षको सोही अवधिको तुलनामा २६ प्रतिशतले बढी हो ।
महामारीका कारण विश्व बजारमा चिप अभाव हुँदा सामसङले चिप बिक्रीबाट मात्रै २२ अर्ब ६० करोड अमेरिकी डलर आम्दानी गरेको वित्तीय विवरणमा उल्लेख छ । महामारीका कारण गरिएको लकडाउनका कारण चिप निर्माता कम्पनीहरू बन्द हुँदा र वर्क फ्रम होम अभ्यासका कारण बढेको कम्युटर डिभाइसको मागले विश्व बजारमा चिप अभाव देखिएको थियो ।
महामारीको अवधिमा पनि आफूले समान्य अवस्थाको जस्तै परिमाणमा चिप निर्माण गरेको सामसङले जनाएको छ । मोबाइलको बिक्री बढेका कारण पनि यो वर्ष नाफा बढेको सामसङले जनाएको छ । मोबाइल बिक्रीबाट मात्रै सामसङले यो त्रैमासिकमा २४ अर्ब २० करोड अमेरिकी डलर आम्दानी गरेको छ ।
सामसङले आफ्नो डिस्प्ले व्यापारबाट मात्रै यो तीन महिनाको अवधिमा ७ अर्ब ५० करोड डलर आम्दानी गरेको वित्तीय विवरणमा उल्लेख छ । ठूला खालका डिस्प्लेको माग घटे पनि साना खालका डिस्प्लेको माग यो अवधिमा बढेको कम्पनीले जनाएको छ ।