काठमाडौं । फेसबुकले प्रयोगकर्ताको फेस रिकग्निसन (अनुहार पहिचान गर्ने) सिस्टम बन्द गर्ने निर्णय गरेको छ । योसँगै कम्पनीले हालसम्म संकलन भएको एक अर्बभन्दा बढी प्रयोगकर्ताको फेसप्रिन्ट समेत डिलिट गर्ने बताएको छ ।
कम्पनीले केही वर्षदेखि लागू गरेको फेस रिकग्निसन सिस्टमले फोटा तथा भिडिओमा भएका व्यक्तिको अनुहार पहिचान गरी अरु कसैले फोटा हालेको छ भने सम्बन्धित व्यक्तिलाई नोटिफिकेशन दिने लगायतका काम गर्दथ्यो ।
तर, उक्त सिस्टम राखेसँगै फेसबुकको निरन्तर आलोचना हुँदै आयो । त्यतिमात्रै नभएर फेसबुकले यसैका कारण राजनीतिक, कानूनी तथा नीतिगत दबाब खेप्नुपरेको थियो । त्यसैलाई मध्यनजर गर्दै कम्पनीले अन्ततः उक्त सिस्टम हटाउने निर्णय गरेको हो ।
‘आउँदो साता फेस रिकग्निशन प्लेटफर्म हामी बन्द गर्दैछौ,’ फेसबुकको प्यारेन्ट कम्पनी मेटाले जारी गरेको वक्तव्यमा भनिएको छ, ‘सँगै हालसम्म संकलन भएका एक अर्ब फेसियल रिकग्निशन टेम्प्लेट समेत डिलेट गर्दैछौं ।’