बिक्रेतालाई देखाएर अब ईकमर्स कम्पनी पन्छिन नपाउने
पुस १८, २०७७ १५:४७
काठमाडाैं। विद्युतीय व्यापार (ईकमर्स) अन्तर्गत कुनै वस्तु वा सेवा ग्राहकले मन नपराएमा विक्रेता वा उत्पादक कम्पनीलाई कारण देखाएर ईकमर्स कम्पनी पन्छिन नपाउने व्यवस्था आउने भएको छ ।
उद्योग, वाणिज्य तथा आपूर्ति मन्त्रालयले विद्युतीय व्यापार व्यवस्थापन गर्न तयार पारेको विधेयक मस्यौदामा ईकमर्स कम्पनीलाई जिम्मेवार बनाउन र ग्राहकको हित संरक्षण गर्न थप व्यवस्था समेत गरिएको छ ।
जसअनुसार बिक्री गरेको वस्तु तथा सेवा ग्राहकलाई स्वीकारयोग्य नभई कानून अनुसार फिर्ता गरेमा त्यस्तो वस्तु तथा सेवा आफैंले उत्पादन गरेको सरह कम्पनीले फिर्ता, सट्टापट्टा वा रकम शोधभर्ना गर्नुपर्नेछ ।
साथै विधेयकमा कुनै वस्तु तथा सेवा खरिद गर्न ग्राहकले आफ्नो पहिचान जनाउने वैयक्तिक विवरण व्यवसायीलाई उपलब्ध गराउनु पर्ने भएमा त्यस्तो विवरण संरक्षण गर्नुपर्ने व्यवस्था गरिएको छ ।
मन्त्रालयले विधेयक मस्यौदामा सरोकारवालाहरुबाट राय सुझाव माग गरेको छ । यदि यसमा तपाईंको कुनै सल्लाह सुझाव छ भने निश्चित ढाँचामा मन्त्रालयलाई ईमेल पठाउन सक्नुहुनेछ ।
पछिल्लो अध्यावधिक: असोज २, २०७९ २२:३०
