काठमाडौं । नेपाल राष्ट्र बैंकले मोबाइल तथा इन्टरनेटमा आधारित बैंकिङ कारोबारको सीमा एकै पटक दोब्बरले बढाएको छ । अब प्रतिदिन मोबाइल बैंकिङबाट २ लाख र इन्टरनेटमार्फत (मर्चेन्ट पेमेन्ट) २० लाख रूपैयाँसम्म भुक्तानी गर्न सकिने भएको छ ।
यसअघि मोबाइल बैंकिङमार्फत प्रतिदिन एक लाख रुपैयाँ र इन्टरनेट बैंकिङमार्फत १० लाख रूपैयाँसम्म काराेबार गर्न पाइन्थ्याे ।
राष्ट्र बैंकका अनुसार यो सीमा एउटै व्यक्तिको नाममा बैंक तथा वित्तीय संस्थामा रहेको एउटा खाताबाट सोही व्यक्तिको नाममा सोही संस्थामा रहेको अर्को खातामा रकमान्तर गर्दा भने लागू हुनेछैन ।
त्यतिमात्रै नभएर सरकारको सम्बन्धित कार्यालयमा भुक्तानी गर्नुपर्ने कर, राजस्व, जरिवाना, सवारी दस्तुर लगायतका सेवा शुल्क भुक्तानी गर्दा कुनै सीमा लाग्ने छैन ।
यस्तै विद्युत सेवा, दूरसञ्चार सेवा, खानेपानी सेवा, बीमा प्रिमियम, सामाजिक सुरक्षा भत्ताको रकम, शिक्षण संस्था (विद्यालय/कलेज), स्वास्थ्य संस्था, हवाई सेवा, यातायात सेवा र होटल तथा रेष्टुरेन्ट सेवाकाे कारोबारको भुक्तानी गर्नुपर्ने बिल बमोजिमको रकम भुक्तानीमा पनि सीमाले बाधा पुर्याउने छैन ।
धितोपत्र व्यवसाय गर्न अनुमतिपत्र प्राप्त धितोपत्र दलालहरूसँग धितोपत्रहरूको कारोबारबापत तोकिएको बैंकमा रकम भुक्तानी गर्दा पनि सीमाले असर नगर्ने उल्लेख गरिएको छ ।
केन्द्रीय बैंकबाट अनुमतिपत्र प्राप्त भुक्तानीका विशेष उपकरणहरुमा समेत सीमाले बाधा नपुर्याउने बताइएकाे छ ।