दूरसञ्चार तथा प्रविधि क्षेत्रका यी ५ कम्पनी, जसले जारी गर्दैछन् आईपीओ
साउन १३, २०७८ १३:३९
काठमाडौं । यतिबेला शेयर बजार उत्कर्षमा पुगेको छ । त्यहीअनुसार बजारमा लगानी गर्नेको सङ्ख्यामा पनि उल्लेख्य वृद्धि भएको छ । नयाँ कम्पनीहरू पनि प्राथमिक शेयर (आईपीओ) जारी गरी कम्पनीमा सार्वजनिक लगानी भित्र्याउन जुटिरहेका छन् ।
आर्थिक वर्ष २०७७/७८ मा मात्रै ३२ कम्पनी प्राइभेटबाट पब्लिक कम्पनीको रुपमा रूपान्तरण भएका छन् । त्यसमध्ये सूचना प्रविधि क्षेत्रका कूल ५ कम्पनीले स्वामित्व परिवर्तन गराएका छन् ।
जसमा निजी क्षेत्रको सबैभन्दा ठूलो दूरसञ्चार सेवाप्रदायक कम्पनी एनसेल आजियाटा, इन्टरनेट सेवाप्रदायक कम्पनी वर्ल्डलिङ्क कम्युनिकेसन, सुबिसु केवल नेट, लुप नेटवर्क र एसटीसी कार्ड सेवाप्रदायक कम्पनी स्मार्ट टेक्नोलोजिज रहेका छन् ।
यसरी स्वामित्व परिवर्तन गराएका सबै कम्पनीले साधारण शेयर जारी गर्छन भन्ने चाँहि पक्कै होइन । तर, पब्लिक कम्पनीको रुपमा दर्ता भएका कम्पनीले साधारण शेयर जारी गर्नसक्ने सम्भावना भने रहन्छ ।
कम्पनी ऐन २०६३ को पछिल्लो संशोधित व्यवस्थाअनुसार पाँच करोड रुपैयाँभन्दा बढी चुक्ता पुँजी भएका दूरसञ्चार कम्पनीहरू पब्लिकमा जानुपर्ने व्यवस्था छ ।
त्यसैका आधारमा एनसेल, वर्ल्डलिङ्क, सुबिसुजस्ता सेवाप्रदायक स्वामित्व परिवर्तन गरी पब्लिक कम्पनी भएका हुन् । एनसेल अघिल्लो साउन १९ गतेबाट पब्लिक कम्पनीको रुपमा परिणत भएको थियो । कम्पनीले हालसम्म साधारण शेयर जारी गर्ने विषयमा भने कुनै आधिकारिक जानकारी भने दिएको छैन ।
त्यस्तै देशकै ठूलो इन्टरनेट सेवाप्रदायक कम्पनी वर्ल्डलिङ्कले सर्वसाधारणमा शेयर जारी गर्ने विषयमा यसअघि नै जानकारी दिइसकेको छ । कम्पनीको २५ औं वार्षिकोत्सवको अवसरमा कम्पनीका अध्यक्ष दीलिप अग्रवालले अबको तीन वर्षमा कम्पनीले सर्वसाधारणका लागि शेयर जारी गर्ने जानकारी दिएका थिए ।
अर्को इन्टरनेट सेवाप्रदायक कम्पनी सुबिसु पनि ७ महिना अघिमात्रै पब्लिक कम्पनीमा परिणत भएको हो । कम्पनीका प्रमुख कार्यकारी अधिकृत विनय साउदका अनुसार तत्कालै आईपीओ जारी गर्ने योजना नभएपनि अन्ततः यसको उद्देश्य त्यही नै भएको बताए ।
‘अझै केही वर्ष आईपीओ जारी गर्ने विषयमा कुनै तयारी छैन,’ उनले भने, ‘तर, भविष्य भनेको त्यही नै हो । त्यसका लागि आवश्यक काम विस्तारै अघि बढ्नेछ ।’
पछिल्लो अध्यावधिक: असोज २, २०७९ २२:३१
