काठमाडौं । अमेरिकी अन्तरिक्ष संस्था नासाले एलन मस्कको कम्पनी स्पेस एक्सलाई दिएको ‘मुन कन्ट्रयाक्ट’ विरुद्ध अमेजनका मालिक तथा पूर्वसीईओ जेफ बेजोस अदालत पुगेका छन् ।
स्पेस एक्स एक्लैलाई उक्त परियोजना दिनुमा नासाको केही आधारभूत समस्या रहेको र यो अनुचित भएको भन्दै उनले मुद्दा दर्ता गराएका हुन् ।
नासाले सन् २०२४ भित्र चन्द्रमाको सतहमा सुरक्षित रुपमा अवतरण गर्नका लागि ‘ल्यान्डिङ क्राफ्ट’ निर्माण गर्ने परियोजना अघि बढाएको छ । त्यसका लागि नासाले गएको अप्रिल महिनामा स्पेस एक्ससँग सम्झौता गरेको थियो ।
प्रारम्भिक चरणमा दुई वटा कम्पनीलाई छनोट गर्ने नासाको योजना थियो । तर, बजेट अभावका कारण अन्त्यमा एउटा मात्रै कम्पनी स्पेस एक्सलाई २.९ अर्ब डलरमा उक्त कामको जिम्मा दिएको थियो ।
उक्त ठेक्कामा जेफ बेजोसको कम्पनी ब्लु ओरिजन समेत समावेश भएको थियो । तर, नासाले ब्लु ओरिजनको प्रस्तावलाई नकार्दै अनुभवका आधारमा स्पेस एक्स छनोट गरेको थियो ।
त्यतिमात्रै नभएर स्पेस एक्सले बेजोसको कम्पनी ब्लु ओरिजनको तुलनामा कम रकम समेत कम राखेको थियो ।
यसरी उक्त परियोजना मस्कको कम्पनी स्पेस एक्ससँग पुगेसँगै केही समयअघि बेजोसले ‘मुन कन्ट्रयाक्ट’ परियोजना २ अर्ब डलरमै गर्नसक्ने भन्दै आफ्नो कम्पनीलाई प्रदान गर्न आग्रह गरेका थिए ।
उक्त विषय अमेरिकाको गभर्मेन्ट अकाउन्टेबिलिटी अफिस (जीएओ) ले अध्ययनसमेत गरेको थियो । जीएओले पनि उक्त विषयमा एलन मस्ककाे कम्पनीलाई दिएको निर्णय ठीक भएको भनी जवाफ दिएसँगै बेजोस अदालत पुगेका हुन् ।