यस्ता छन् याे वर्ष गुगलमा सर्वाधिक खोजिएका विषय

मंसिर २३, २०७८ १३:४०

काठमाडौं । सन् २०२१ लाई फर्केर हेर्दा तपाईंले गुगलमा के के खोज्नुभयो त ? गत वर्ष गुगलमा सबैभन्दा बढि खोजी भएको शीर्षक कोरोना भाइरस थियो । यो वर्ष भने प्रयोगकर्ता विस्तारै आफ्नै पुरानो दैनिकीमा फर्किएको जस्तो देखिन्छ ।

किनभने यो पटक गुगल सर्चमा कोरोना भाइरस तथा भ्याक्सिनले त्यति धेरै स्थान पाएन । हुन त सन् २०२१ मा गुगलमा सबैभन्दा बढी खोजिएका समाचारमध्ये तेस्रो स्थानमा कोरोना नै रहेको छ । तर, अन्य हिसाबले कोरोना शब्दले यो वर्ष त्यति धेरै स्थान पाएन ।

गुगलले सन् २०२१ मा सबैभन्दा धेरै खोजी भएका विभिन्न शीर्षकहरूको सूची सार्वजनिक गरेको छ । हरेक वर्ष जस्तै यो वर्ष पनि गुगलले सन् २०२१ मा सर्वाधिक खोजी भएको समाचार, कलाकार, खेलाडी, खानेकुरा, गेम, मुभिज, मान्छे, गीत, टिभी सो लगायतको सूची सार्वजनिक गरेको हो ।

यो वर्ष सबै भन्दा बढी खेलकुदसँग सम्बन्धित विषय खोजी भएको छ । हुन पनि हो कोरोनाका कारण सन् २०२० मा आयोजना नभएका खेल समेत यो वर्ष सम्पन्न भयो । त्यो हुँदा धेरैका लागि खेलकुद यो वर्ष चासोको विषय बन्यो । त्यसैले पनि धेरै प्रयोगकर्ताले विभिन्न खेलका बारेमा गुगलमा वर्षभरी सर्वाधिक खोजी गरेको गुगलले जनाएको छ ।

२०२१ मा सर्वाधिक खोजी गरिएको शीर्षक

अष्ट्रेलिया भर्सेज इन्डिया
इन्डिया भर्सेज इंग्ल्यान्ड
आईपीएल
एनबीए
युरो २०२१
कोपा अमेरिका
इन्डिया भर्सेज न्युजिल्यान्ड
टि२० वर्ल्ड कप
स्क्विड गेम
डीएमएक्स

यी लगायत विषयगत रुपमा हेर्दा समाचार तर्फ सबैभन्दा धेरै अफगानिस्तानको समाचार खोजी भएको छ । तालिवानले अफगानिस्तानमा कब्जा जमाएसँगै त्यहाँको अवस्था धेरैका लागि चासोको विषय बनेको थियो । भने कोभिड भ्याक्सिनसँग सम्बन्धित समाचार तेस्रो स्थानमा छ ।

त्यस्तै सबैभन्दा धेरै खोजी गरिएको कलाकारमा ‘एलेक बाल्डविन’ रहेका छन् भने खेलाडीमा ‘क्रिश्चियन एरिक्सन’ रहेका छन् । खाने कुरामा ‘बिरिया टाकोज्’ रहेको छ ।

खेलतर्फ भने सबैभन्दा धेरै ‘पपक्याट’ को खोजी गरिएको छ जबकी टिभी सो तर्फ भने ‘स्क्विड गेम’ रहेको छ । त्यस्तै गुगलमा सर्वाधिक खोजिएको स्पोर्टस् टिम ‘रियल म्याड्रिड’ रहेको छ ।