१९ वर्षीय ह्याकरले नियन्त्रणमा लिए टेस्लाका २० ओटा कार

काठमाडौं । जर्मनीका १९ वर्षीय एक ह्याकरले टेस्लाका गाडीहरूमा पहुँच बनाएर नियन्त्रणमा लिएका छन् । ट्वीटरमा ट्वीट गर्दै डेभिड कोलोम्बो नाम गरेका ती युवाले १० ओटा देशमा भएका २० ओटा टेस्ला कारमा भेटिएको सफ्टवेयरको सुरक्षा कमजोरीको फाइदा लिँदै आफूले ती गाडीमा पहुँच बनाउन सफल भएको उल्लेख गरेका छन् ।

सवारीधनीहरूले प्रयोग गरेको थर्ड पार्टी एपहरूमा भएको सुरक्षा कमजोरीका कारण आफूले सफ्टवेयरबाटै ती कारहरू ह्याक गरी ढोका र झ्याल अनलक गर्न सफल भएको बताएका छन् । त्यसैगरी उनले केही गाडी चाबी बिना नै स्टार्ट गरेका थिए भने केहीको सेक्युरिटी सिस्टम नै डिसेबल गरिदिएका थिए ।

उनले गाडीमा भएको क्यामेरा मार्फत ड्राइभरमाथि निगरानी समेत राख्न सकेको कुरा बताएका छन् । डेलिमेलसँग कुरा गर्दै उनले भनेका छन्, ‘यो सुरक्षा कमजोरी टेस्ला कम्पनीको तर्फबाट भन्दा पनि सवारीधनीले प्रयोग गरेको थर्ड पार्टी एपबाट भेटिएको हो । ‘

So, I now have full remote control of over 20 Tesla’s in 10 countries and there seems to be no way to find the owners and report it to them…

— David Colombo (@david_colombo_) January 10, 2022

यद्यपि आफूले ह्याक गरेका सवारीको विषयमा सवारी धनीलाई जानकारी दिन टेस्लाको टिम र सो थर्ड पार्टी एपको डेभलपसँग सम्पर्कमा रहेको उनले बताएका छन् । सुरक्षा कमजोरी गाडी र उक्त थर्ड पार्टी एपको प्रोग्रामलाई लिंक गर्ने सफ्टवेयरले प्रयोग गर्ने सवारीधनीको विवरणमा भएको उनको भनाई छ ।

यद्यपि उनले सो सफ्टवेयरको विषयमा भने कुनै जानकारी दिएका छैनन् । यो घटना अहिले ट्वीटरमा एउटा चर्चाको विषय बनेको छ । कसैले यसलाई पब्लिक स्टन्ट भनेका छन् भने कसैले मुद्दा जायज भएको बताएका छन् ।

पछिल्लो अध्यावधिक: असोज २, २०७९ २२:३२

टिप्पणीहरू