मालवेयर प्रयोग गरी लाखौं फेसबुक प्रयोगकर्ताको पासवर्ड चोरी, कतै तपाईं त पर्नुभएन ?

काठमाडौं । फेसबुक क्रेडेन्सियल (युजरनेम र पासवर्ड) चाेरी गर्ने एक एप लाखाैं डिभाइसमा इन्स्टल भएकाे पाइएकाे छ ।

गुगल प्ले स्टाेरबाट ‘क्राफ्ट्सआर्ट कार्टुन फोटो टुल्स’ (Craftsart Cartoon Photo Tools) नामक याे एप एक लाखभन्दा बढी डिभाइसमा इन्स्टल भएकाे पाइएकाे हाे ।

यस एपमार्फत प्रयोगकर्ताले आफ्नो फोटो अपलोड गरेर साे फोटोको कार्टुन क्यारेक्टर बनाउन मिल्छ । विगत एक हप्ताको समयावधिमा ‘प्राडियो’ नामक मोबाइल सुरक्षा कम्पनीले एन्ड्रोइड एपमा ‘फेस स्टिलर’ नामको ट्रोजन भेटाएको थियो ।

यस्तोमा एपको रुपमा इन्स्टल हुने एप प्रयोग गर्नका लागि प्रयोगकर्ताको फेसबुक लगईन आईडी माग्ने गरिन्छ । प्रयोगकर्ताले आफ्नो फेसबुक लगईन राखेपछि उक्त युजर आईडी र पासवर्डमा ह्याकरले सजिलै पहुँच राख्छन् ।

अहिले प्ले स्टोरबाट यो एप हटिसकेको छ । यद्यपि एक लाखभन्दा बढी प्रयोगकर्ताले यो एप डाउनलोड गरिसकेका थिए भने प्ले स्टोरमा १.७ रेटिङ पाएको थियो ।

यस्तो प्रकारको मालवेयरलाई स्टिलर मालवेयर (stealer malware) भनिन्छ, जहाँ कुनै एप वा वेबसाइट अथवा अन्य कुनै अनलाइन सेवाको रुपमा मालवेयर सार्वजनिक गरेर प्रयोगकर्ताको पहुँचमा पुर्‍याइन्छ र त्यसबाट डेटा चोरी गर्ने गरिन्छ ।

यस्ता एप अझै पनि प्ले स्टोरमा धेरै हुनसक्ने प्राडियोले तयार गरेको रिपोर्टमा उल्लेख छ ।

केही एप थाहा पाउने वित्तिकै हट्छन्, केही अलि समय रहन्छन् र पछि आफै हट्छन् भने केही एप लामो समयसम्म प्ले स्टोरमा नै रहिरहने गर्छन् ।

पछिल्लो अध्यावधिक: असोज २, २०७९ २२:३२

टिप्पणीहरू