काठमाडौं । राष्ट्रिय परिचयपत्रको वैयक्तिक तथा जैविक विवरण संकलनका लागि राष्ट्रिय सभागृहमा समेत अनलाइन विवरण दर्ता स्टेसन सञ्चालनमा आएको छ ।
काठमाडौं महानगरपालिकाभित्र बसोबास गर्ने नेपाली नागरिककको सहजता एवं सुविधाका लागि मंगलबारदेखि सभागृहमा पनि दर्ता स्टेसन सञ्चालनमा ल्याइएको हो ।
यसअघि काठमाडौंबासीका लागि जिल्ला प्रशासन कार्यालय, काठमाडौंबाट मात्र यो सेवा लिन पाइन्थ्यो ।
साथै विभिन्न जिल्ला नागरिकहरुका लागि काठमाडौं र ललितपुरका जिल्ला प्रशासन कार्यालयका अतिरिक्त नारायणी दरबार परिसर (साविकको राहदानी विभाग) मा सञ्चालन गरिएका दर्ता स्टेसन यथावत् रहेको राष्ट्रिय परिचयपत्र तथा पञ्जीकरण विभागले जनाएको छ ।
साथै विभागले विभिन्न जिल्लामा राष्ट्रिय परिचयपत्रका लागि विवरण संकलनको कार्य तीव्र रूपमा भइरहेको समेत जानकारी दिएको छ ।
राष्ट्रिय परिचयपत्रका लागिके के चाहिन्छ ?
– नेपाली नागरिकताको सक्कल प्रमाणपत्र
– नागरिकताको प्रमाणपत्रमा जन्म मिति नखुलेकोमा सो खुल्ने प्रमाणपत्र
– बसाइँसराइ गरेको हकमा सोको सक्कल प्रमाणपत्र
– विवाहितको हकमा नागरिकतामा पति वा पत्नीको नाम उल्लेख नभएमा विवाह दर्ता प्रमाणपत्र वा नाता खुल्ने प्रमाणको सक्कल