close

रूसमा गुगलको अर्को प्रतिबन्ध, अब सशुल्क एप अपडेट तथा डाउनलोड गर्न नपाइने

टेकपाना टेकपाना

बैशाख २४, २०७९

रूसमा गुगलको अर्को प्रतिबन्ध, अब सशुल्क एप अपडेट तथा डाउनलोड गर्न नपाइने

काठमाडौं । गुगलले रुसका प्रयोगकर्तालाई प्ले स्टोरमा सशुल्क एप अपडेट तथा डाउनलोड गर्नबाट प्रतिबन्ध लगाएको छ । गत मार्च महिनामा गुगलले रुसमा एन्ड्रोइड एप र सब्स्क्रिप्सन लगायतका सेवामा प्रतिबन्ध लगाएको थियो ।

अब भने गुगलले रूसमा प्ले स्टोरमा उपलब्ध सशुल्क एपहरूको डाउनलोड र अपडेट पनि प्रतिबन्ध गरेको छ । यद्यपि नि: शुल्क एपमा भने कुनै परिवर्तन नहुने गुगलले जनाएको छ ।

गुगलका अनुसार रुसी प्रयोगकर्ताले निःशुल्क एप उपलब्ध गराउन, डाउनलोड गर्न र अपडेट गर्न भने सक्नेछन् ।

मार्च १० मा गुगल प्लेको बिलिङ अथवा भुक्तानी प्रक्रिया रुसले युक्रेनमाथि आक्रमण गरेको कारण रोकिएको थियो । यसले नयाँ एप खरिद, सब्सक्रिप्सन भुक्तानी र ईन-एप खरिदलगायतका गतिविधिलाई असर गरेको छ ।

गुगलले डेभलपरहरूलाई एक वर्षसम्मका लागि भुक्तानी नवीकरण स्थगित गर्न पनि सुझाएको छ । साथै यो समयमा निःशुल्क एप बनाएर सेवा दिन पनि गुगलले डेभलपरहरूलाई आग्रह गरेकाे छ ।