यस्ता छन् विश्वकै सबैभन्दा महँगा फोनहरू

जेठ १६, २०७९ १५:३७

काठमाडौं । तपाईंको स्मार्टफोनको मूल्य कति हो ? कतिलाई लाग्न सक्छ म त एकदमै सस्तो फोन बोकिरहेको छु, भने कतिलाई लाग्न सक्छ म निकै महँगो फोन प्रयोग गर्छु । महँगाे लागेको फोनको मूल्य कति हाे ? एक लाख वा दुई लाख ? यदि यहि मूल्यलाई तपाईं सबैभन्दा महँगो फोन हो भनेर सोच्नुहुन्छ भने तपाईं गलत पनि हुनसक्नुहुन्छ ।

यति कुरामा तपाईं ढुक्क हुनुहोस् कि विश्वमा तपाईंको फोनको तुलनामा कयौं गुणा महँगा फोनहरू बजारमा उपलब्ध छन्, जसको प्रयोग विश्वका धेरै प्रयोगकर्ताहरूले गरिरहेका छन् ।

हाल बजारमा नयाँ आईफोनको मूल्य औसत १ लाख २५ हजार रुपैयाँ हाराहारी पर्छ जुन विश्वका धेरै मानिसहरूका लागि निकै मोटो रकम हो । त्यस्तै कुनै आईफोन यति महँगा छन् जसको मूल्य अर्बौं रुपैयाँ पर्छ। विश्वका सर्वाधिक महँगा फोनको सूचीको पहिलो पाँच फोनमा एप्पलको आइफोन पर्छ । तीनै शीर्ष पाँच महँगा फोनको सूची र ती फोनमा के कस्ता कुराहरू समावेश छन् भन्ने जानकारी यहाँ उल्लेख गरिएको छ ।

१. फाल्कन सुपरनोभा आईफोन ६ पिङ्क डाइमण्ड

विश्वको सबैभन्दा महँगो फोन हो फाल्कन सुपरनोभा आईफोन ६ पिंक डाइमण्ड । यो ६ अर्ब रुपैयाँभन्दा बढी मूल्यमा बिक्री भएको थियो । फाल्कन सुपरनोभा, आईफोन ६ लाई पुन: निर्माण गरी सन् २००४ मा पिंक डाइमण्ड मोडेल सार्वजनिक गरिएको फोन थियो ।

यो फोनलाई २४ क्यारेट सुनले ढाकिएको छ भने यसलाई निकै नै दुर्लभ र मूल्यवान मानिएको गुलाबी हीराले सजाइएको छ । यसलाई प्लाटिनमले लेपन गरिएको छ । त्यस्तै यस फोनलाई ह्याक हुनबाट जोगाउन ह्याक प्रिभेन्सन प्रविधि समेत समावेश गरिएको छ ।

विश्वको सबैभन्दा महँगो यो फोन एसियाको दोस्रो धनी व्यक्ति मुकेश अम्बानीकी पत्नी र भारतीय क्रिकेट टोली मुम्बई इन्डियन्सकी मालिक नीता अम्बानीले खरिद गरेकी छिन् ।

२. आईफोन ४ एस एलिट गोल्ड

विश्वको दोस्रो महङ्गो फोनको सूचीमा आउँछ एप्पलको आईफोन ४ एस एलिट गोल्ड । यो फोनको मूल्य १ अर्ब १६ करोड रुपैयाँ भन्दा बढी छ । विश्वको सबैभन्दा महँगो फोनको सूचीमा दोस्रो भएको फोन प्रति धेरै कुराको अपेक्षा हुनु स्वभाविक नै हो । यदि तपाईँहरूलाई पनि त्यस्तै लागेको छ भने चिन्ता नलिनुहोस् यसमा तपाईंले अपेक्षा गरे अनुरूपकै फिचरहरू रहेका छन् ।

यो फोन हातबाट बनेको फोन हो जसलाई पाँचसय र एकसय क्यारेट हीराले लेपन गरिएको छ । यो फोनको लोगोलाई चौबीस क्यारेट सुनले निर्माण गरिएको छ भने फोनमा भएको लोगोमा ५३ वटा हीरा रहेका छन् जसले यस फोनलाई अझ आकर्षक बनाएको छ ।

त्यस्तै यसको होम बटन ८.६ क्यारेट सिंगल कट हीराले बनाइएको छ । यो फोनको बडि भने सोलिड प्लाटिनमले बनाइएको छ, जसलाई टि-रेक्स डायनासोरको हड्डीको टुक्राले पलिस गरिएको हो । त्यस्तै यसमा निकै नै बहुमूल्य रत्न जस्तै ओपल्स, स्टार सनस्टोन, रुटिलेटेड क्वार्ज, चारोइट र पिइटरसाइट प्रयोग गरिएको छ ।

३. आईफोन ४ डायमन्ड रोज एडिसन

विश्वका सबैभन्दा महँगा फोनको सूचीमा तेस्रो नम्बरमा आउँछ एप्पलकै आईफोन ४ डायमन्ड रोज एडिसन । यो फोनको मूल्य ९९ करोड ४ लाख रुपैयाँ रहेको छ । यस फोनलाई विशेष बनाउन हालसम्म यस्ता दुईवटा फोन मात्र निर्माण भएका छन् । यो फोनलाई खरिद गर्ने मान्छेको इच्छा अनुरूप नै कस्टमाइज गरिएको छ ।

यो फोनमा सोलिड रोज गोल्ड प्रयोग गरिएको छ भने यसमा पाँचसय र सय क्यारेट हीरा समावेश छन् । यसमा भएको एप्पल लोगो ५३ वटा हीराले सजाइएको छ । त्यस्तै यसको होम बटन ७.४ क्यारेट सिंगल कट पिङ्क डायमन्डले बनाइएको छ । यसलाई सोलिड ग्रेनाइट बक्समा प्याक गरिएको छ ।

४. गोल्ड स्ट्राइकर आईफोन ३ जीएस सुप्रिम

विश्वका सर्वाधिक महँगा फोनको चौथो सूचीमा छ गोल्डस्ट्राइकर आईफोन ३ जीएस सुप्रिम । यसलाई दुई सय ७१ ग्रामको २१ क्यारेट सुनले बनाइएको हो । यो फोनमा १३६ वटा हीरा प्रयोग भएको छ । जसमध्ये ५३ वटा हीरा फोनको एप्पल लोगोमा समावेश गरिएको छ । यसको होम बटनमा भने ७.१ क्यारेटको सिंगल-कट डायमण्ड प्रयोग गरिएको छ ।

यदि तपाईंले गोल्ड स्ट्राइकर आईफोन ३ जीएस सुप्रिम किन्नुभयो भने तपाईंले ग्रेनाइटको सिंगल टुक्राबाट बनेको ग्रेनाइट बक्स पाउनु हुनेछ । त्यस्तै यो फोनको बक्सलाई विश्वको उच्च स्तरीय छाला र कश्मीर गोल्ड प्रयोग गरी आकर्षक बनाइको छ । आईफोन ३जीएस किङ्ग्सको मूल्य ३० करोड ६१ लाख रुपैयाँ रहेको छ ।

५. आईफोन ३जी किङ्ग्स बटन

विश्वका सर्वाधिक महँगा मोबाइलको सूचीमा पाँचौं नम्बरमा एप्पलको आईफोन ३जी किङ्ग्स बटन रहेको छ । यसको मूल्य करिब ३१ करोड रुपैयाँ रहेको छ । यो फोन १८ क्यारेट पहेँलो, सेतो र रोज गोल्डले बनेको छ । फोनको वरिपरि सेतो लाइन देख्न सकिन्छ जसलाई १ सय ३८ वटा हीराले सजाइएको छ ।