ह्वाट्सएपमा अपरिचित कल उठाउँदा अश्लील भिडिओ बनाएर ब्ल्याकमेल गर्न थाले

मैले सामाजिक सञ्जाल चलाउन थालेको १० वर्ष भयो । यतिका समयमा पहिलोपटक म यस्तो घटना र आपराधिक मानसिकताको शिकार बनेँ । म जस्ता अरु युवा शिकार नबनुन् भनेर यो ब्लग लेख्दैछु । 

सोमबार बिहान ११ बजेतिर म आफ्नो कार्यालयमा थिएँ । एकाएक नयाँ नम्बरबाट ह्वाट्सएपमा रिक्वेस्ट मेसेज आयो । सामान्य रुपमा हेर्दा ‘फेक प्रोफाइल’ जस्तो पनि लागेन । मैले सधैँ झैँ ‘मेसेज रिक्वेस्ट एसेप्ट’ गरेँ । 

केही मिनेट नबित्दै ह्वाट्सएपमा नयाँ नम्बरबाट कल आयो । मैले कल उठाएँ, भिडि‌‌ओ कल रहेछ । स्क्रिनमा देखिएकी अन्दाजी २१ वर्षकी ती युवती आफ्नो कपडा खोल्न थालिन् र हेर्दाहेर्दै निर्वस्त्र भइन् । एकछिन त मैले केही सोच्न, विचार गर्नै सकिनँ । जीवनमा पहिलो पटक यस्तो घटना ममाथि भइरहेको थियो ।

अप्रत्याशित रुपमा यस्तो घटना घटेपछि कसरी प्रतिक्रिया जनाउने भन्ने कुराको भेउ नपाइँदो रहेछ । कार्यालयमा सँगै रहेका साथीहरूको सल्लाहमा मैले भिडिओ अफ गरेँ र लगत्तै कल काटेँ । 

मैले कल काटेपछि केही मेसेजहरू आए जसमा मलाई फेरि कलमा जोडिन प्रस्ताव गरिएको थियो । मैले मानिनँ । यतिन्जेल मलाई यो कुनै उग्र यौन चाहना भएकी युवतीको हर्कत हो कि भन्ने लाग्यो । कहाँ फसियो भनेर दिमाग रन्थनियो । 

एकैछिनमा ह्वाट्सएपमा एउटा भिडिओ प्राप्त भयो । खोलेर हेरेँ । त्यसमा भर्खरै भएको करिब एक मिनेटको भिडिओ कल र नजाने कसको ५० सेकेन्ड जतिको हस्तमैथुन गरेको भिडिओ जोडेर, मेरो नाम, मोबाइल नम्बर सहित भिडिओ बनाइएको रहेछ ।

भिडिओ हेर्दाहेर्दै अर्को मेसेज आयो । भिडिओ डिलिट गर्न पैसा लाग्छ, पैसा नदिए भिडियो भाइरल गरिदिन्छु भनेर चेतावनीपूर्ण मेसेज आउन थाले । 

करिब १५ मिनेटभित्रै यो सम्पूर्ण घटना घट्यो । मलाई लगातार धम्कीपूर्ण मेसेजहरू आउन थाले । पाँच मिनेटभित्र पैसा नदिए भिडिओ भाइरल गरिदिने भन्दै झन्डै सय ओटा भिडिओ मेसेज आए । मैले ती भिडिओ नखोली हटाइदिएँ ।

अनि ह्वाटस एप अनइस्टल गरेँ । सार्वजनिक छवि भएका युवाहरूलाई लक्षित गर्दै यसरी ब्ल्याकमेल हुने गरेको जानकारी पाएपछि मैले आम जनचेतनाका लागि यो ब्लग लेखेको हुँ । 

सामाजिक सञ्जाल प्रयोग गर्दा अपनाउनुपर्ने सुरक्षा विधिको अवलम्बन गर्न चुकियो भने यस्ता आपराधिक गिरोहहरूको फन्दामा परिँदो रहेछ । अब नेपाल प्रहरीको साइबर ब्यूरो, सूचना प्रविधि तथा साइबर सुरक्षाका साथीहरू आदिको सहयोगमा यसमा संलग्न गिरोहलाई कानूनी दायरामा ल्याउनेतर्फ मेरो प्रयास रहनेछ ।   

ह्वाट्सएपमार्फत कल गरेर मेरो टाउको भएको भिडिओ खिचेर आपराधिक गिरोहले त्यसमा अश्लील भिडिओ जोडी मेरा आफन्त तथा साथीभाइहरूलाई मेसेज पठाउन थालेको छ । त्यसैले उक्त मेसेज बेवास्ता गरिदिनु हुन हार्दिक अनुरोध गर्दछु ।

साथै उक्त मेसेज खोलेर आफूलाई पनि यस्तै अर्को शिकार नबनाउनुहोला । मेरो फेसबुकको फ्रेन्ड्स लिस्ट र व्यक्तिगत विवरण सबैले हेर्न मिल्नेगरी खुल्ला रहँदा यस्तो आपत आइपरेको हो कि भन्ने पनि लागेको छ ।

यो घटनापछि मैले आफ्नो फेसबुकमा रहेका साथीहरूको सूची र व्यक्तिगत विवरण गोप्य तुल्याइसकेको छु । साइबर अपराध र ब्ल्याकमेलिङको दुनियाँ खतरनाक छ, सावधान ! तपाईँ भने सुरक्षित रहनुहोला !

पछिल्लो अध्यावधिक: असोज २, २०७९ २२:३६

टिप्पणीहरू