निरन्तर अक्सिजन र मुटुको गति नाप्ने ओप्पो ब्याण्ड नेपाली बजारमा
असार १०, २०७९ १०:१८
काठमाडौँ । नेपाली बजारमा नयाँ ओप्पो ब्याण्ड भित्रिएको छ । कम्पनीले लगातार ब्लड अक्सिजन मनिटरिङ फङ्शन प्रदान गर्ने ब्याण्ड ल्याएको हो, जसले प्रत्येक सेकेन्ड ब्लड अक्सिजन सेचुरेसनको निगरानी गर्ने बताइएको छ ।
‘ओप्पो ब्यान्डले १२ वर्कआउट मोडहरू र अन्य सुविधाजनक फिचर पनि प्रदान गर्दछ, जुन सक्रिय, व्यस्त जीवनशैलीका लागि उपयुक्त छ,’ कम्पनीले विज्ञप्ति जारी गर्दै जानकारी दिएको छ ।
डिजाइनको कुरा गर्दा यो ब्यान्ड १.१ इन्च फुल कलर अमोल्ड स्क्रिनको साथ उपलब्ध छ । ओप्पो ब्यान्डको हेल्थ मनिटरिङ फङ्क्सनले विशेषतः निद्राको समस्या पत्ता लगाउन सहयोग गर्ने कम्पनीको भनाइ छ ।
‘यसले सही निद्रा निगरानी, हर्ट रेट निरन्तर अनुगमन गरी विश्लेषण प्रदान गर्दछ,’ कम्पनीले भनेको छ, ‘प्रयोगकर्ता सुतिरहेको बेला रगत अक्सिजनको मात्रा प्रति सेकेन्ड निरन्तर निगरानी गर्न सक्षम बनाउँछ । आठ-घण्टाको निद्रामा यसले २८,८०० पटक नन–स्टप SpO2 (अक्सिजन सेचुरेसन) अनुगमन गर्छ ।’
प्रयोगकर्ताको शरीरको अक्सिजनको मात्रा पूर्ण रूपमा मापन गर्दै यसको निरन्तर SpO2 मोनिटर र व्यावसायिक निद्रा मनिटरको साथ, ओप्पो ब्यान्डले प्रयोगकर्ताहरूलाई स्वस्थ निद्रा बानीहरू विकास गर्न मद्दत गर्ने कम्पनीकाे दाबी छ ।
ओप्पो ब्यान्डमा मुटुको गति मनिटर पनि छ । बिल्ट–इन अप्टिकल हार्ट रेट सेन्सरले प्रयोगकर्ताको हृदय गति चौबीसै घण्टा निगरानी राख्नसक्छ ।
यदि मुटुको धड्कन धेरै बढ्यो भने, स्मार्ट ब्यान्डले प्रयोगकर्तालाई अनियमित हृदयघातको चेतावनी दिन भाइब्रेट गर्ने कम्पनीकाे भनाइ छ ।
‘ओप्पो ब्यान्डले व्यायामको क्रममा मुटुको धड्कन मापन गर्दा प्रयोगकर्ताले ओभर–ट्रेनिङबाट बच्न सक्छन् र उनीहरूले आफ्नो लक्ष्यमा अघि बढिरहेका छन् भनी सुनिश्चित गर्न उनीहरूले कस्तो गति कायम राख्न आवश्यक छ भनी सिक्न सक्छन्,’ विज्ञप्तिमा उल्लेख छ ।
निद्रा सम्बन्धी समस्याहरू बाहेक, युवा वयस्कहरू सबैभन्दा बढी चिन्तित हुने अर्को स्वास्थ्य समस्या भनेको व्यायाम हो । यसमा दौडने, हिँड्ने, साइकल चलाउने, पौडी खेल्ने, ब्याडमिन्टन, क्रिकेट, योग आदि लगायत १२ वटा अन्तर्निहित वर्क आउट मोडहरू छन्, जसले युवामाझ लोकप्रिय भएका अधिकांश खेलहरूलाई समेट्छ ।
ओप्पो ब्यान्डले व्यायाम डेटा रेकर्ड गर्छ भने प्रयोगकर्ताहरूले HeyTap Health एपमा आफ्नो प्रोगेस जाँच गर्न सक्छन् ।
’ओप्पो ब्यान्डले प्रयोगकर्ताको स्मार्टफोन विस्तारको रूपमा पनि काम गर्नसक्ने जनाइएकाे छ । प्रयोगकर्ताहरूले यसबाटे मेसेज र कल नाेटिफिकेसन प्राप्त गर्न सक्छन्, म्युजिक प्लेब्याक नियन्त्रण गर्न सक्छन्, र ब्यान्डबाटै आफ्नो मोबाइल फोनहरू फेला पार्न सक्छन्,’ कम्पनीले भनेकाे छ ।
ब्याट्रीको लागि ओप्पो ब्यान्डमा उच्च क्षमता र कम पावर प्रोसेसरयुक्त १०० एमएएच ब्याट्री रहेको छ, जुन साढे एक घण्टामा पूर्ण रूपमा चार्ज गर्न सकिन्छ ।
पछिल्लो अध्यावधिक: असोज २, २०७९ २२:३३
