close

नेपालीले पठाएको १६ प्रतिशत मेसेज सम्बन्धित व्यक्तिलाई नपुग्ने, स्मार्ट टेलिकममा धेरै समस्या

टेकपाना टेकपाना

असार १४, २०७९

नेपालीले पठाएको १६ प्रतिशत मेसेज सम्बन्धित व्यक्तिलाई नपुग्ने, स्मार्ट टेलिकममा धेरै समस्या

काठमाडौं । दूरसञ्चार सेवा प्रदायकको नेटवर्कमार्फत प्रयाेगकर्ताले पठाएकाे मेसेज सम्बन्धित व्यक्तिलाई नपुग्ने गरेको पाइएको छ ।

नियामक निकाय नेपाल दूरसञ्चार प्राधिकरणले हालै सार्वजनिक गरेको दूरसञ्चार सेवा प्रदायकको सेवाको गुणस्तर अध्ययन तथा मापन प्रतिवेदनले औसतमा १६.६० प्रतिशत मेसेज सम्बन्धित प्रयोगकर्तालाई नपुग्ने देखाएको हो ।

प्राधिकरणले गत पुसदेखि चैतसम्म परामर्शदाता लगाएर सेवा प्रदायकले उपलब्ध गराएको सेवाको गुणस्तर मापन गरेको थियो । परामर्शदाताले उपलब्ध गराएको प्रतिवेदनअनुसार दूरसञ्चार सेवा प्रदायक हरेक हिसाबले गुणस्तरीय सेवा दिनबाट चुकेका छन् ।

टेलिफोनमा चुकेका कम्पनीहरू मेसेजमा पनि नराम्रोसँग चुकेको पाइएको छ । यो अध्ययन प्रदेश १, मधेश प्रदेश र गण्डकी प्रदेशमा सेवा प्रदायकअनुसार भएको थियो ।

यसअन्तर्गत प्रदेश १ मा नेपाल टेलिकमबाट पठाएको एसएमएसको सफल दर ९९.९४ प्रतिशत रहेको छ । एनसेलको ९९.०७ हुँदा स्मार्टसेलको जम्मा ७९.५९ प्रतिशतमात्रै रहेको छ । यो प्रदेशमा औसतमा ७९.५९ प्रतिशत मेसेजमात्रै सफल हुने गरेको छ ।

त्यस्तै मधेश प्रदेश अन्तर्गत पनि औसतमा ८८.४० प्रतिशतमात्रै मेसेज सफल हुने गरेको अध्ययनले देखाएको छ, जसमा नेपाल टेलिकमको ९९.५९, एनसेल ९९.३० र स्मार्टसेलको ६६.३५ प्रतिशतमात्रै एसएमएस सफल हुने गरेको छ ।

त्यस्तै गण्डकी प्रदेशमा नेपाल टेलिकमको ९८.९१, एनसेल ९९.१३ र स्मार्टसेलको ४८.५३ रहेको छ । यो हुँदा गण्डकी प्रदेशमा औसतमा ८२.१९ प्रतिशत मात्रै पठाएको मेसेज पुग्ने देखिन्छ ।

यसरी तीन प्रदेशलाई एकै ठाउँमा ल्याएर औसतमा हर्ने हो भने नेपालीले पठाएको ८३.४० प्रतिशतमात्रै म्यासेज सफल हुने गरेको छ ।

सेवा प्रदायकको आधारमा हेर्ने हो भने सबैभन्दा कमजोर स्मार्टसेल देखिएको छ ।

तीन प्रदेशमा भएको अध्ययन अनुसार स्मार्टसेलको औसतमा ५१.५४ प्रतिशतमात्रै म्यासेज सफल हुने गरेको छ । त्यस्तै नेपाल टेलिकमको ९९.४८ र एनसेल ९९.१६ सफल हुने गरेको प्रतिवेदनले देखाएको छ ।