स्टार्टअपका लागि इन्टरनेटबाटै आर्थिक सहयोग तथा ऋण सङ्कलन गर्न सक्ने व्यवस्था आउँदै
साउन ६, २०७९
काठमाडौं । स्टार्टअप व्यवसायमा कर्जा कर्जा पहुँच बढाउन ‘क्राउड फन्डिङ’ र ‘पियर टु पियर लेन्डिङ’को व्यवस्था गरिने भएको छ ।
शुक्रबार चालु आर्थिक वर्ष २०७९/८० को मौद्रिक नीति सार्वजनिक गर्दै गभर्नर महाप्रसाद अधिकारीले यसका लागि अध्ययन कार्य अगाडि बढाउने घोषणा गरेका हुन् ।
“चालु आर्थिक वर्षमा स्टार्टअपमा कर्जा पहुँच बढाउन वैकल्पिक वित्तका स्वरूपहरू ‘पियर टु पियर लेन्डिङ’ ‘क्राउड फन्डिङ’को लागि अध्ययन गरिनेछ,” उनले भने ।
व्यक्ति तथा व्यवसायका लागि अनलाइन सेवाको माध्यमबाट उपयुक्त सम्पर्क कायम गरी ऋण तथा सापटी लेनदेन गर्ने अभ्यासलाई नै पियर टु पियर लेन्डिङ भन्ने गरिन्छ ।
त्यस्तै कुनै परियोजना वा कम्पनीका लागि ठूलो सङ्ख्यामा रहेका जनताबाट विशेषतः इन्टरनेटमार्फत सहयोग रकम सङ्कलन गर्ने परिपाटीलाई क्राउड फन्डिङ हो ।
सहयोग रकम तथा ऋण सङ्कलनका लागि पछिल्लो समय यस्ता उपायहरू लोकप्रिय बन्दै गइरहेका छन् ।
पछिल्लो अध्यावधिक: असोज २, २०७९
