काठमाडौं । ट्वीटर प्रयोगकर्ताको जानकारी सहितको डेटा डार्क वेबमा बिक्रीका लागि राखिएको छ । ‘डेभिल’ नामक व्यक्तिले ५० लाखभन्दा बढी प्रयोगकर्ताको डेटा ३० हजार डलरमा बिक्रीमा राखेका हुन् ।
यो डेटा यही वर्षको सुरुमा भएको ह्याकिङ घटनाबाट संकलन गरिएको दाबी गरिएको छ । लिक भएको डेटामा प्रयोगकर्ताको ईमेल एड्रेस, फोन नम्बर रहेको जनाइएको छ । तर, यो डेटामा पासवर्ड भने छैन ।
त्यो हुँदा सुरक्षाको चुनौती केही कम हुने आँकलन गरिएको छ । ह्याकरले यो डेटामार्फत प्रयोगकर्ताको अकाउन्टमै पहुँच बनाउन नसके पनि बिक्रीमा राखिएको डेटालाई विभिन्न प्रयोजनका लागि दुरूप्रयोग गर्न सक्छन् ।
यसअन्तर्गत फिशिङ, आईडेन्टीटी थेप्ट, अथवा कतिपय अवस्थामा अकाउन्टमै पहुँच बनाउनसक्ने अवस्था रहन सक्छ ।
डेभिलका अनुसार यो डेटमा चर्चित व्यक्तिका साथै ठूला कम्पनीको समेत जानकारी समावेश छ । यसरी डेटा डार्क वेबमा बिक्रीमा राखिएसँग ट्वीटरले यो विषयमा अध्ययन सुरु गरेको छ ।