close

भीपीएन बिनै कसरी हेर्ने इन्टरनेटमा ब्लक गरिएका वेबसाइट ?

टेकपाना टेकपाना

मंसिर ९, २०७९ १९:३२

भीपीएन बिनै कसरी हेर्ने इन्टरनेटमा ब्लक गरिएका वेबसाइट ?

काठमाडौं । आफूले चाहेको कुनै पनि वेबसाइटमा प्रयोग गर्ने सुविधा सबैलाई हुँदैन । यसमा पनि तपाईँ रहेको देशको सरकारले आफूले अनुमति नदिएका समाचार हेर्न नसकोस् भन्ने चाहेको हुनसक्छ ।

कतिपय अवस्थामा देशको नीति पछ्याउँदै दूरसञ्चार कम्पनीले नै साइटमा प्रतिबन्ध लगाएका हुन्छन् । चाहे जुनसुकै सन्दर्भ नै किन नहोस्, ब्लक भएका वेबसाइट हेर्ने अनेक उपाय हुन्छन् ।

विशेषगरी भीपीएन प्रयोग गरी वा डीएनएस परिवर्तन गरेर ब्लक गरिएका साइट खोल्न सकिन्छ । आज हामी भीपीएन प्रयोग नगरेरै ब्राउजरको सेटिङबाट त्यस्ता साइट कसरी खोल्न सकिन्छ भन्ने विषयमा जानकारी दिँदैछौँ । 

ब्लक भएका वेबसाइट माेबाइलमा हेर्ने तरिका

-सबैभन्दा पहिले क्रोममा जानुहोस् ।

-त्यसपछि माथि दायाँपट्टि रहेको तीन ओटा थोप्लामा ट्याप गर्नुहोस् ।

-अनि 'सेटिङ' अप्सनमा जानुहोस् ।

-सेटिङमा गइसकेपछि 'प्राइभेसी एन्ड सेटिङ' अप्सनमा जानुहोस् ।

-यति गरेपछि  त्यहाँ रहेको 'युज सेक्युअर डीएनएस' (Secure DNS)  मा जानुहोस् ।

-अनि तल रहेको 'चुज एनोदर प्रोभाइडर'को अप्सनमा जानुहोस् ।

-त्यसपछि कस्टुमाइज्डमा ट्याप गरेर क्लाउडफ्लेयर (१.१.१.१) छान्नुहोस् ।

यति गरिसकेपछि तपाईँको स्मार्टफोनको क्रोम ब्राउजरमा ब्लक गरिएका साइट चल्न थाल्छन् । 

ल्यापटप वा डेस्कटपमा यसरी खोल्नुहोस् ब्लक गरिएका साइट

कम्प्युटर वा ल्यापटमा सबैले एउटै ब्राउजर प्रयोग गर्छन् भन्ने हुँदैन । हामीले यहाँ दिएको प्रक्रिया हरेक ब्राउजरका लागि लागू हुन्छ । ब्लक गरिएका साइटहरू खोल्न तलको प्रक्रिया अपनाउनुहोस्;

-सबैभन्दा पहिले आफूले प्रयोग गर्ने ब्राउजर खोल्नुहोस् ।

-त्यसपछि माथि दायाँपट्टि रहेको तीन ओटा थोप्ला वा लाइनमा क्लिक गर्नुहोस् ।

-यति गरेपछि त्यहाँ रहेको 'सेटिङ' अप्सनमा जानुहोस् ।

-अनि बायाँपट्टि रहेको 'प्राइभेसी एन्ड सेटिङ' अप्सन छान्नुहोस् ।

यति गरेपछि त्यहाँ रहेको 'सेक्युरिटी' अप्सन छान्नुहोस् ।

-त्यसपछि 'युज सेक्युअर डिएनएस' (Use Secure DNS) को अप्सनमा रहेको 'विथ' (With) अप्सन छानी कस्टममा क्लिक गर्नुहोस् ।

-र, क्लाउडफ्लेयर (१.१.१.१) को अप्सन छान्नुहोस् ।

यति गरेपछि तपाईँले ब्लक गरिएका साइट खोल्न सक्नुहुन्छ ।

साइट ब्लक गर्नुमा तपाईँ रहेको देश, उक्त साइटले निम्ताउने समस्या, वा अन्य विविध कारणहरू हुन सक्छन् । यस्तोमा ब्लक गरिएका साइट खोलिसकेपछि व्यक्तिगत विवरण राख्ने वा एक्सेस दिने काम गर्नु हुँदैन । साथै यस्ता साइट ब्राउजरमा भएको इनकग्निटो मोडमा खोल्दा सुरक्षित भइन्छ ।

पछिल्लो अध्यावधिक: मंसिर ९, २०७९ २२:३९