पाइरेटेड लिंक पठाई कलाकारहरूको फेसबुक अकाउन्ट ह्याक, रकम ठग्न खोज्दा प्रहरी फन्दामा
माघ ५, २०७९ १७:३१
काठमाडौं । सामाजिक सञ्जालमा अनधिकृत पहुँच बनाई ठगी गरेको आरोपमा दुईजना पक्राउ परेका छन् । पक्राउ पर्नेमा नुवाकोट घर भई हाल काठमाडौं बस्ने १७ वर्षीय एक किशाेर र रसुवा घर भई हाल काठमाडौं बस्ने १९ वर्षीय विवेक आचार्य रहेका छन् ।
पक्राउ परेका दुवैजनाले सामाजिक सञ्जालका च्याटमार्फत विभिन्न व्यक्तिलाई ठगी गरेकाे साइबर ब्यूराेले जनाएकाे छ । ''विशेषत: उनीहरूले चलचित्र क्षेत्रमा काम गर्ने व्यक्तिलाई आफू मोडल भएको झुट्टा पोस्ट तथा फिल्मका लिङ्कमा क्लिक गर्न लगाउँथे,'' ब्यूराेका प्रवक्ता प्रहरी उपरीक्षक पशुपति कुमार रायले भने, ''पीडितहरूले त्यस्ता लिङ्कमा क्लिक गर्दा अकाउन्ट नै ह्याक हुन्थ्याे । यसपछि ह्याक भएका अकाउन्टबाट विभिन्न व्यक्तिलाई ठगी गर्थे ।''
ह्याक गरिएका त्यस्ता अकाउन्टबाट ठगी गरेको सूचना पाएपछि यी दुई व्यक्ति पक्राउ परेकाे रायले जनाए । "उनीहरूले यसरी पचासौँ मान्छेको अकाउन्ट ह्याक हरेको आशंका छ," उनले टेकपानासँग भने ।
''यति मात्र नभई उनीहरू पीडितलाई सामाजिक सञ्जालमा एड गर्थे । एड गरेर भिडिओ कल गरी कलमा आफैँ नाङ्गो भई सो भिडिओ रेकर्ड गर्थे । त्यसबाहेक पीडितलाई पनि विभिन्न प्रलोभनमा पारेर भिडिओ पठाउन लगाउँथे । त्यही भिडिओको आडमा सम्पूर्ण परिवार तथा साथीलाई पठाइदिन्छु भन्दै पीडितहरूको गोप्य सूचना (युजरनेम, पासवर्ड र ओटीपी कोड) लग्थे,'' उनले भने ।
सामाजिक सञ्जालमार्फत ठगी गरेकाे उजुरी परेपछि गत पुस २९ गते उनीहरूलाई पक्राउ गरिएकाे उनले जानकारी दिए ।
दुवै आरोपितलाई सामाजिक सञ्जालको दुरुपयोग गरी भएको ठगी अन्तर्गतको कसूरमा काठमाडौं जिल्ला अदालतबाट पक्राउ अनुमति पक्राउ गरी आवश्यक अनुसन्धान भइरहेकाे छ ।
पछिल्लो अध्यावधिक: माघ ५, २०७९ १७:३१
