सञ्चालनमा आयो र्याफ्टिङ, बन्जी, प्याराग्लाइडिङ, जिपलाइन जस्ता साहसिक पर्यटनको टिकेट बुकिङ एप
भदौ १७, २०८१ ११:२३
काठमाडौँ । अनलाइन ट्राभल एग्रिगेटर (ओटिए) प्लेटफर्म 'ट्रिप टर्बो' सञ्चालनमा आएको छ । सेवाग्राहीले मोबाइल एपबाटै ट्राभल एण्ड टुर्ससँग सम्बन्धित विभिन्न सेवा लिन सक्ने नेपाली बजारलाई लक्षित अनलाइन प्लेटफर्म गरी सुरु भएको हो ।
एपमार्फत् हवाई टिकट बुकिङ, साहसिक पर्यटनसँग सम्बन्धित गतिविधि, बस टिकट, होटेल बुकिङ लगायतका सुविधा लिन सकिने ट्रिप टर्बोका संस्थापक शिखर प्रसाईंले बताए । साहसिक पर्यटनतर्फ र्याफ्टिङ, बन्जी, प्याराग्लाइडिङ, हट एयर बेलुन, जिपलाइन, आइस स्केटिङ लगायतका थुप्रै गतिविधिका लागि टिकट बुक गर्न सकिन्छ ।
ट्रिप टर्बो पाँच दशकभन्दा लामो समयदेखि पर्यटन क्षेत्रमा क्रियाशील नटराज टुर्स एण्ड ट्राभल्सको सिस्टर कम्पनी हो । ट्रिप टर्बोमार्फत हवाई टिकट बुकिङ गर्दा पहिलो टिकटमा ३०० रुपैयाँ र त्यसपछिका टिकटमा २०० रुपैयाँ छुट समेत पाइने छ । परीक्षणको रूपमा जनवरी २०२४ देखि सुरु गरिएको यो एप अब भने पूर्ण रूपमा सञ्चालनमा आएको हो ।
एपमार्फत कुनै पनि सेवा लिँदा ईसेवा, खल्ती, मोबाइल बैंकिङ, अन्तर्राष्ट्रिय कार्ड (भिजा, मास्टर कार्ड, युनियन पे, अमेरिकन एक्सप्रेस) मार्फत भुक्तानी गर्न सकिनेछ । प्रसाईंका अनुसार सेवा प्रदायक र सेवाग्राहीबिचको दूरी कम गर्न, पर्यटन क्षेत्रलाई थप टेवा पुर्याउन तथा नेपाली संस्कृति र इतिहासको संरक्षणका क्षेत्रमा योगदान पुर्याउने उद्देश्यले एप ल्याइएको हो । विभिन्न सेवा प्रदान गरिएको हो ।
ट्रिप टर्बो एपमा निकट भविष्यमा अन्तरराष्ट्रिय हवाई उडानको टिकट, अन्तरराष्ट्रिय होटल बुकिङ लगायतका सुविधा थप गरिने बताइएको छ । एप्पल प्रयोगकर्ताले एप स्टोर र एन्ड्रोइड प्रयोगकर्ताले गुगल प्ले स्टोरबाट यो एप डाउनलोड गरि प्रयोग गर्न सक्छन् । अथवा ट्रिप टर्बोको आधिकारिक वेबसाइटमा लग इन गरेर पनि आफूले चाहेको सेवा लिन सकिन्छ ।
पछिल्लो अध्यावधिक: भदौ १७, २०८१ ११:२३
