अवैध अनलाइन जुवाको प्रचारमा विराटनगर किङ्ग्स पनि

मंसिर १८, २०८१ १३:५२

काठमाडौं । नेपाल प्रिमियर लिग (एनपीएल) को फ्रेन्चाइज टिम विराटनगर किङ्ग्ससमेत अनलाइन सट्टेबाजी प्लेटफर्मको प्रचारमा लागेको छ । टिमको जर्सीमा ‘बिजे स्पोर्ट्स’ को लोगो राखी टिमले नेपालमा अवैध अनलाइन जुवाको प्रचार गरिरहेको छ ।

यसो त बीजे स्पोर्ट्सले आफूलाई क्रिकेटको समाचार प्रसारण गर्ने सञ्चारमाध्यमका रूपमा प्रस्तुत गरेको छ । तर त्यसलाई सञ्चालन गर्ने कम्पनी 'बीजे ८८' नेपालमा अवैध मानिएको अनलाइन बेटिङ प्लेटफर्म हो ।

विराटनगर किङ्ग्सको जर्सी पछाडि 'बीजे स्पोर्ट्स बाई बीजे ८८' लेखिएको स्पष्ट देखिन्छ । प्रतियोगितामा दुई खेल खेलेको टिमले सुरुवातदेखि नै यस प्लेटफर्मको प्रचार गरिरहेको छ । अरू सबै प्रायोजक र साझेदारको नाम सार्वजनिक गरेको टिमले बीजे ८८ बारे बाहिर मुख खोलेको छैन ।

बीजे स्पोर्ट्सबाट सहजै 'बीजे ८८' नामक अनलाइन बेटिङ प्लेटफर्ममा पुग्न सकिन्छ । यसमा नेपालको लोकेसन छानेर अकाउन्ट बनाउने हो भने सजिलै नेपाली वालेट र बैंक खाताबाट रकम जम्मा गर्न सकिन्छ । यसमा खुलेआम रूपमा ईसेवा र खल्ती वालेटको लोगो राखिएको छ । बैंकबाट भुक्तानी गर्न चाहनेका लागि प्रभु बैंकको खाता नम्बर उपलब्ध गराइएको छ ।

एनपीएलकै अर्को टोली सुदूरपश्चिम रोयल्स पनि खुला रूपमा अनलाइन अवैध जुवा प्लेटफर्म बाबु ८८ को प्रचारमा लागेको छ । त्यसो त एनपीएल आयोजक नेपाल क्रिकेट संघ (क्यान) को प्रायोजक नै अनलाइन बेटिङसँग सम्बन्धित कम्पनी हो ।

क्यानले उल्फ७७७ लाई अनलाइन स्पोर्टको समाचार पोर्टलको रूपमा प्रस्तुत गरेको छ । तर, उल्फ७७७ को मुख्य धन्धा अनलाइन क्यासिनो/जुवा हो । नेपाल दूरसञ्चार प्राधिकरणले अनलाइन जुवा खेलाउने प्लेटफर्मका वेबसाइटमाथि प्रतिबन्ध लगाउने निर्णय गरेपनि नेपालमा उल्फ७७७ को वेबसाइट सहजै चलिरहेको छ ।