यसरी ब्लक गर्नुहोस् एन्ड्रोइड फोन वा ट्याब्लेटमा आउने विज्ञापन

पुस ८, २०८१ १३:३२

काठमाडौं । विज्ञापनहरूले वेबसाइट र एप डेभलपरहरूलाई आर्थिक रूपमा टिकाइ राख्न महत्त्वपूर्ण भूमिका खेल्छन्, जसले गर्दा उनीहरूले नि:शुल्क वा कम लागतमा सेवा उपलब्ध गराउन सक्छन् । तर, अत्यधिक विज्ञापनले प्रयोगकर्ताको अनुभव बिगार्न सक्छ, उत्कृष्ट एन्ड्रोइड फोनहरू सुस्त बनाउँछ, र ब्याट्रीको आयु घटाउँछ ।

खुसीको कुरा, एन्ड्रोइडले तपाईँको डिभाइसमा विज्ञापन रोक्न वा सीमित गर्नका लागि विभिन्न विकल्पहरू पनि दिन्छ । आज हामी तपाईँलाई एन्ड्रोइडमा कसरी विज्ञापन ब्लक गर्ने भन्ने विषयमा बताउँदै छौँ ।

गुगल क्रोममा विज्ञापन, पप-अप, र रिडाइरेक्ट ब्लक गर्ने तरिका

गुगल क्रोममा डिस्टर्ब गर्ने खाले विज्ञापन र पप-अपहरू रोक्नका लागि बिल्ट-इन टुल उपलब्ध छन् । यी टुलहरू कसरी एक्टिभ गर्ने त ?

१. आफ्नो एन्ड्रोइड डिभाइसमा गुगल क्रोम खोल्नुहोस् ।

२. माथिको दायाँ कुनामा रहेको तीन-डट भएको मेनुमा थिच्नुहोस् र सेटिङ्समा जानुहोस् ।

३. साइट सेटिङ्ससम्म स्क्रोल गर्नुहोस् र पप-अप्स एन्ड रिडाइरेक्ट्स चयन गर्नुहोस्।

४. पप-अप्स एन्ड रिडाइरेक्ट्सलाई अन छ भने अफ गर्नुहोस्।

५. फेरि साइट सेटिङ्स पेजमा फर्किनुहोस्, इन्स्ट्रुसिभ एड्स (डिस्टर्ब गर्ने विज्ञापन) चयन गर्नुहोस् र यसलाई पनि अफ गर्नुहोस् ।

गुगल क्रोमले केही विज्ञापनहरू ब्लक गरे पनि, यसले मोबाइलमा एड-ब्लकिङ एक्सटेन्सनलाई भने सपोर्ट गर्दैन । क्रोमको विकल्पको रूपमा रहेका सामसङ इन्टरनेट, फायरफक्स र ब्रेभ जस्ता ब्राउजरहरूले एड-ब्लकिङका लागि एक्सटेन्सन वा बिल्ट-इन टुलको माध्यमबाट थप प्रभावकारी सुविधा प्रदान गर्छन् ।

गुगल क्रोममा साइट नोटिफिकेसन व्यवस्थापन गर्नु होस्

वेबसाइटहरूलाई नोटिफिकेसन पठाउन अनुमति दिनुले स्पाम जस्ता अलर्ट दिन सक्छन् । तर तपाईँ यी नोटिफिकेसनलाई सीमित वा ब्लक गर्न सक्नु हुन्छ र आफ्नो एन्ड्रोइडमा अधिकांश विज्ञापनहरूलाई रोक्न सक्नुहुन्छ ।

१. यसका लागि गुगल क्रोमको एप आइकनलाई लामो समयसम्म थिच्नुहोस् र ‘i’ बटन थिचेर एप इन्फोमा जानुहोस् ।

२. नोटिफिकेसनमा जानुहोस् र अल साइट्स नोटिफिकेसन चयन गर्नुहोस् ।

३. अनुमति दिइएका साइटहरूको सूची नियाल्नु होस् र आवश्यक नभएका साइटहरूको नोटिफिकेसन बन्द गर्नुहोस् ।

४. गोपनीयता थप बढाउनका लागि क्रोममा टार्गेटेड एड ट्र्याकिङ डिसेबल गर्नुहोस् ताकि तपाईँको ब्राउजिङ हिस्ट्रीको आधारमा व्यक्तिगत विज्ञापनहरू रोक्न सकियोस् ।

होम स्क्रिनमा विज्ञापन ब्लक गर्ने

होम स्क्रिनका विज्ञापनहरू ब्राउजर वा नोटिफिकेसन विज्ञापनभन्दा बढी डिस्टर्ब गर्ने खालका हुन्छन् । केही एपहरूले “डिस्प्ले ओभर अदर एप्स” अनुमति दुरुपयोग गरेर फोनभर ब्यानर विज्ञापन देखाउँछन् ।

१. यी विज्ञापनहरू ब्लक गर्नका लागि विज्ञापन देखाउने एपको आइकनलाई लामो समयसम्म थिच्नुहोस् र एप इन्फोमा जानुहोस् ।

२. डिस्प्ले ओभर अदर एप्स चयन गर्नुहोस् र अनुमति बन्द गर्नुहोस् ।

३. यदि एप आवश्यक छैन भने, एप इन्फो पेजबाटै एपलाई अनइन्स्टल गर्न पनि सक्नु हुन्छ ।

विज्ञापन ब्लक गर्न डीएनएस सर्भिस प्रयोग गर्ने

विभिन्न वेबसाइट तथा एपहरूको विज्ञापन रोक्ने एउटा सजिलो तरिका हो, डीएनएस सर्भिस । एडगार्ड डीएनएस (AdGuard DNS) जस्ता सर्भिसले निःशुल्क विकल्प दिन्छन् । सामान्य विज्ञापन ब्लक गर्नः dns.adguard-dns.com प्रयोग गर्न सक्नु हुन्छ भने एडल्ट कन्टेन्ट सहित पारिवार केन्द्रित फिल्टरका लागिः family.adguard-dns.com राख्न सक्नु हुन्छ ।

कसरी सेट गर्ने डीएनएस एड ब्लकर ?

सबैभन्दा पहिला सेटिङ एप खोल्नुहोस् ।
कनेक्सन अथवा नेटवर्क हुँदै प्राइभेट डीएनएसमा जानुहोस् ।
अब प्राइभेट डीएनएस प्रदायकको होस्टनेम चयन गरेर चाहेको डीएनएस एड्रेस राख्नुहोस् । (उदाहरणका लागिः dns.adguard-dns.com)
अब अप्लाई गर्न सेभ गर्नुहोस् ।

डीएनएसमा आधारित भएर विज्ञापन ब्लक गर्ने कार्य प्रभावकारी हुन्छ । तर यसले वेबसाइट लोड हुन लाग्ने समय सुस्त हुन सक्छ अथवा केही निश्चित साइटहरूमा समस्या देखिन सक्छ ।

प्रिमियम सब्सक्रिप्सन प्रयोग गर्ने

धेरै डेभलपरहरूले विज्ञापन मार्फत आय आर्जन गर्छन् । तर, उनीहरूले प्रायः प्रिमियम सब्सक्रिप्सनमार्फत विज्ञापन रहित अनुभव प्रदान गर्छन् । उदाहरणका लागि, युट्युब र स्पोटिफाइ जस्ता प्लेटफर्महरूले विज्ञापन हटाउनुका साथै अतिरिक्त सुविधाहरू उपलब्ध गराउँछन्।

एप इन्स्टलेसन गर्दा सावधान रहनुहोस्

अनावश्यक वा कम रेटिङ भएका एपहरू (जस्तै, फ्ल्यासलाइट एप वा थर्डपार्टी लन्चर) इन्स्टल नगर्नुहोस्, किनकि यस्ता एपहरू विज्ञापनले भरिपूर्ण हुन्छन् ।
प्ले स्टोरमा एपका रिभ्युहरू जाँच गर्नुहोस्।
गूगलको प्ले प्रोटेक्टले हानिकारक एपहरू कम गर्न मद्दत गर्छ, तर वैधानिक एपभित्र रहेका विज्ञापनलाई नियन्त्रण गर्न सक्दैन।

एडभान्स: सिस्टम-वाइड एड-ब्लकिङका लागि रुटिङ

आफ्नो एन्ड्रोइड डिभाइसलाई रुटिङ गरेपछि सिस्टम-वाइड एड-ब्लकर राख्न सकिन्छ। तर, यो प्रक्रिया जोखिमपूर्ण हुन्छ । यदि यस क्रममा गल्ती भएमा तपाईँको वारेन्टी नै रद्द हुन सक्छ । त्यसैले यसको सवालमा ध्यानपूर्वक अगाडि बढ्नुहोस् ।

सबै विज्ञापन खराब हुँदैनन्

विज्ञापनहरू धेरै सेवालाई नि:शुल्क रूपमा उपलब्ध गराउन महत्त्वपूर्ण भूमिका खेल्छन् । यिनले तपाईँलाई छुट, नयाँ रेस्टुरेन्ट, वा चासो लाग्ने उत्पादनहरूको जानकारी दिन सक्छन् ।
तर, सबै विज्ञापनहरू ब्लक गर्दा एप र वेबसाइटहरूले सब्सक्रिप्सन-आधारित सेवातर्फ परिवर्तन गर्नुपर्ने सम्भावना हुन्छ ।

यी उपायहरू अपनाउँदा तपाईँ आफ्नो एन्ड्रोइड डिभाइसमा आक्रामक विज्ञापनहरूको प्रभाव कम गर्न सक्नुहुन्छ ।

पछिल्लो अध्यावधिक: पुस ८, २०८१ १३:३२

टिप्पणीहरू