टिकटक बनाउने र फोटो खिच्नेहरुको भिड बढेपछि हटाइँदै न्युरोडको ‘अम्ब्रेला स्ट्रिट’
पुस १८, २०७७ १७:५२
काठमाडौं । केही समययता काठमाडौंको न्युरोडस्थित संकटा मन्दिर वरपर मानिसहरुको भिड बढिरहेको छ । सडकमाथि राखिएका रंगीचंगी ६ सय वटा छाताकै कारण मानिसहरुको चाप दिनदिनै बढेपछि यो क्षेत्र ‘अम्ब्रेला स्ट्रिट’ का नामले चिनिन थालेको छ ।
टिकटक र अन्य सामाजिक सञ्जालमा यो ठाउँमा आएर फोटो र भिडियो खिच्नेको संख्या थामिनसक्नु भएपछि आइतबारदेखि सबै छाता हटाउन लागिएको संकटा क्लबका सचिव आशिषमान सिंहले बताए ।
काेराेनापछि बजारमा मानिसहरूकाे चहलपहल बढाउन ४ लाखकाे लगानीमा सडकमाथि छाता राखिएकाे थियाे ।
तर व्यापार बढ्नुकाे सट्टा उल्टाे टिकटक बनाउने र फाेटाे खिच्नेहरूकाे संख्यामात्रै बढेकाे र ट्राफिक व्यवस्थापनमा समेत समस्या सिर्जना भएकाले छाता हटाउन लागिएकाे क्लबले जनाएकाे छ ।
क्लबका अनुसार अहिलेसम्म अम्ब्रेला स्ट्रिट १० लाखभन्दा बढीले अवलाेकन गरिसकेका छन् ।
पछिल्लो अध्यावधिक: असोज २, २०७९ २२:३०
