close

बगभी प्लेटफर्ममा जोडियो ग्यापु, एउटा बग पत्ता लगाउँदा २४ हजारसम्म कमाउन सकिने

टेकपाना टेकपाना

साउन ५, २०७८

बगभी प्लेटफर्ममा जोडियो ग्यापु, एउटा बग पत्ता लगाउँदा २४ हजारसम्म कमाउन सकिने

काठमाडौं । ईकमर्स कम्पनी ग्यापु नेपालकाे बग बाउन्टी प्लेटफर्म बगभीमा जोडिएको छ । यो प्लेटफर्ममा रहेर साइबर सुरक्षा अनुसन्धानकर्मीहरूले ग्यापुको सिस्टम तथा सफ्टवेयरको परीक्षण गर्नेछन् ।

यो अवसरमा ग्यापुले हरेक भल्नरेबिलिटीका लागि सुरक्षा अनुसन्धानकर्मीलाई १० देखि २०० डलरसम्म रिवार्ड प्रदान गर्ने भएको छ ।

बगभीमार्फत विभिन्न कम्पनीको सिस्टम तथा सफ्टवेयरको कमजोरी पत्ता लगाउने र त्यसबारे जानकारी दिन सकिन्छ । गत पुसदेखि सञ्चालनमा आएको बगभी प्लेटफर्ममा हालसम्म झण्डै दुई दर्जन संस्था जाेडिएका छन् ।

यसै क्रममा अनलाइन शपिङ प्लेटफर्मको रुपमा ग्यापु पनि बग बाउन्टी प्लेटफर्ममा जोडिएको हो । ग्यापुको सिस्टम तथा सफ्टवेयरमा कुनै किसिमको सुरक्षा कमजोरी भेटिएको खण्डमा बगभी प्लेटफर्ममार्फत् दर्ता गराउन सकिने छ ।

यदि उक्त कमजोरी मान्य भएको खण्डमा हरेक भल्नरेबिलिटीका लागि १० देखि २०० अमेरिकी डलरसम्म अर्थात् एक हजारदेखि २४ हजारसम्म रिवार्ड प्रदान गरिने बगभीका संस्थापक नरेश लाम्गादेले बताए ।

यसरी बग बाउन्टी प्लेटफर्म बगभीमा जोडिने कम्पनीमध्ये अनलाइन शपिङ प्लेटफर्मका रुपमा ग्यापु पहिलो बनेको छ ।

सरकारी निकाय, विभिन्न निजी तथा सार्वजनिक संघ-संस्थालाई आफ्नो सेवा उपलब्ध गराउँदै आएको कम्पनीले ग्यापु सिस्टममा जोडिएसँगै अन्य अनलाइन शपिङ प्लेटफर्मसमेत विस्तारै जोडिने जाने अपेक्षा राखेको छ ।