close

इन्टरनेटको अनौठो तथ्याङ्कः धेरै डिभाइसमा चल्ने सिजी, दुइटामा पनि नचल्ने क्लासिक टेक !

टेकपाना टेकपाना

माघ ११, २०७८ १४:१०

इन्टरनेटको अनौठो तथ्याङ्कः धेरै डिभाइसमा चल्ने सिजी, दुइटामा पनि नचल्ने क्लासिक टेक !

काठमाडौं । यदि तपाईँको घरमा फिक्स्ड लाइन ब्रोडब्यान्ड इन्टरनेट (अप्टिकल तथा केबलमा आधारित) जोड्नु भएको छ भने पक्कै पनि परिवारमा भएका प्रायः सबैजसो सदस्यबीचमा शेयर हुन्छ होला । अर्को तरिकाबाट भन्नुपर्दा तपाईँको घरमा जोडेको एउटै इन्टरनेट लाइनमा तपाईँको घरमा भएका ल्यापटप, कम्प्युटर, मोबाइल, टेलिभिजन लगायतका अनेकौँ उपकरण जोडेर चलाउनु हुन्छ ।

अब एकछिन सम्झनुहोस् त, तपाईँको घरमा जोडिएको इन्टरनेट कति डिभाइस अथवा उपकरण बीच शेयर हुन्छ ? २, ४, ७, १० वा अझ त्यो भन्दा पनि धेरै । दूरसञ्चार क्षेत्रको नियामक नेपाल दूरसञ्चार प्राधिकरणले यसका लागि नेपालको औसत घरपरिवार सङ्ख्या ४.८८ लाई आधार मान्ने गरेको छ ।

यसको अर्थ एउटा फिक्स्ड लाइन इन्टरनेट औसतमा ४.८८ जनाबीच शेयर हुन्छ । यसमा अझ कति डिभाइसमा शेयर हुन्छ भनेर सोध्ने हो भने पक्कै पनि सामान्य जवाफ हुन्छ त्यसभन्दा अझ धेरै ।

स्वतन्त्र रजिस्ट्री निकायको रुपमा रहेको एप्निकले एसिया प्रशान्त क्षेत्रमा आईपी अड्रेस वितरण गर्छ । जसले इन्टरनेट सेवाप्रदायकहरूलाई ‘अटोनोमस सिस्टम नम्बर्स’ (एएसएन्स) उपलब्ध गराएको हुन्छ ।

त्यसैमार्फत इन्टरनेटमा सक्रिय रहेका डिभाइस तथा उपकरणको तथ्याङ्क एप्निकले राख्दै आएको छ । जुन तपाईँले यहाँ क्लिक गरी हेर्न सक्नुहुन्छ ।

एप्निकको तथ्याङ्क अनुसार इन्टरनेट सेवाप्रदायकहरूमध्ये सबैभन्दा बढी प्रयोगकर्ता वर्ल्डलिङ्कको नेटवर्कमा छन् । शीर्ष ११ कम्पनीको कुरा गर्ने हो भने त्यसपछि क्रमशः भायनेट, सुबिसु, वेबसर्फर, क्लासिकटेक, टेकमाइन्ड, ब्रोडलिङ्क, डिशहोम (सिम्पल मिडिया), फर्स्टलिङ्क, फाइबर वर्ल्ड र सिजीनेट रहेका छन् ।

अब नेपालमा एउटा कनेक्सनबाट औसतमा कतिवटा डिभाइसमा इन्टरनेट चल्छ भन्ने विषयमा कुरा गरौँ । यसका लागि सुरुमा प्राधिकरणको तथ्याङ्कबाट ग्राहक सङ्ख्या र एप्निकको तथ्याङ्कबाट प्रयोगकर्ता अथवा डिभाइस सङ्ख्या लिएर हेरौँ । त्यसपछि डिभाइस सङ्ख्यालाई ग्राहक अथवा कनेक्सन सङ्ख्याले भाग गरिदिउँ ।

सेवाप्रदायकएप्निकको तथ्याङ्कमा प्रयोगकर्ता सङ्ख्याप्राधिकरणको तथ्याङ्कमा कनेक्सन सङ्ख्याप्रति कनेक्सनमा प्रयोगकर्ता
वर्ल्डलिङ्क2,323,3135505794.22
भायनेट706,8761557694.54
सुबिसु675,7312437332.77
वेबसर्फर318,857740424.31
क्लासिकटेक280,0201883031.49
टेकमाइन्ड252,759699133.62
ब्रोडलिङ्क172,844522933.31
डिशहोम फाइबरनेट146,677384743.81
फर्स्टलिङ्क66,83877868.58
फाइबर वर्ल्ड60,123485312.39
सिजी53,84957219.41
स्रोतः एप्निक र नेपाल दूरसञ्चार प्राधिकरण ।

अब यसरी हेर्दा रोचक र अनौठो तथ्याङ्क निस्किन्छ । जसअनुसार क्लासिक टेकको एउटा कनेक्सनमा चल्ने डिभाइसको औसत सङ्ख्या १.४८ मात्रै देखिन्छ । जुन एकदमै अस्वभाविक लाग्छ ।

अर्कोतर्फ फाइबर वर्ल्डको नेटवर्कमा भने सबैभन्दा बढी औसतमा १२.३८ डिभाइस रहेको देखिन्छ । अन्य सेवाप्रदायकको कुरा गर्ने हो भने एउटा कनेक्सनमा औसत डिभाइस सङ्ख्या वर्ल्डलिङ्कमा ४.२२, भायनेटमा ४.५४, सुबिसुमा २.७७, वेब सर्फरमा ४.३० र टेकमाइन्डमा ३.६२ रहेको देखिन्छ ।

त्यस्तै ब्रोडलिङ्कमा ३.३१, डिशहोममा ३.८१, फर्स्टलिङ्कमा ८.५८ र सिजी नेटमा ९.४१ औसत डिभाइस सङ्ख्या छ । अब यहाँनिर तपाईँलाई कुनै कुनै सेवाप्रदायकमा औसत डिभाइस सङ्ख्या यति धेरै अथवा थोरै किन भन्ने लाग्न सक्छ ।

यसको पछाडि दुई ओटा सम्भावित कारण हुनसक्छन् । पहिलो भनेको सेवाप्रदायकले आफ्नो कनेक्सन वास्तवमा जति छ, त्यसभन्दा धेरै रहेको तथ्याङ्क प्राधिकरणलाई बुझाएका हुन सक्छन् । यस्तोमा औसत डिभाइस सङ्ख्या अस्वभाविक रुपमा कम देखिन्छ ।

अर्को सम्भावित कारण भनेको सेवाप्रदायकले आफ्नो कनेक्सन सङ्ख्या जति छ, त्यसभन्दा थोरेको विवरण मात्रै नियामकलाई दिएका हुनसक्छन् । यस्तोमा अस्वभाविक रुपमा डिभाइस सङ्ख्या धेरै देखिएको हुनसक्छ ।

यो समाचार सामग्रीमा हामीले मोबाइल इन्टरनेट सेवा मात्रै रहेको एनसेल र मोबाइल तथा फिक्स्ड दुवै इन्टरनेट मिश्रित रहेको नेपाल टेलिकमलाई भने समेटेका छैनौँ । 

आशङ्का लागेपछि छानविन सुरु गरेका छौँः पुरुषोत्तम खनाल, अध्यक्ष, नेपाल दूरसञ्चार प्राधिकरण

Purushottam khanal nta
नेपाल दूरसञ्चार प्राधिकरणका अध्यक्ष पुरुषोत्तम खनाल । तस्वीरः टेकपाना

केही इन्टरनेट सेवाप्रदायकको ग्राहक सङ्ख्याको विषयमा आशङ्का लागेपछि हामीले अनुगमन शाखा अन्तर्गत छानविन अगाडि बढाएका छौँ । यसअनुसार आठ दश ओटा सेवाप्रदायकहरू हाम्रो छानविनको दायरामा छन् ।

अर्को तर्फ स्वतन्त्र चार्टर्ड अकाउन्टेन्ट मार्फत उनीहरूको ग्राहक सङ्ख्या र आम्दानीको विषयलाई चेक जाँच गर्ने कार्य समेत अगाडि बढेको छ । अब चाँडै नै त्यसको रिपोर्ट आउनेछ । कुनै किसिमको गडबडी देखिएको खन्डमा कानून अनुसार आवश्यक कारबाही अगाडि बढाउँछौँ ।

पछिल्लो अध्यावधिक: असोज २, २०७९ २२:३२