स्पाम र फेक अकाउन्टको जानकारी नदिए ट्वीटरको डिलबाट पछि हट्ने एलन मस्कको धम्की
जेठ २४, २०७९ १२:४७
काठमाडौं । टेस्लाका मालिक एलन मस्कले स्पाम र फेक अकाउन्टको जानकारी नदिएको खण्डमा ट्वीटर खरिदको डिलबाट पछि हट्ने धम्की दिएका छन् । मस्कले करिब दुई महिनाअघि ४४ अर्ब डलरमा ट्वीटर खरिदका लागि सम्झौता गरेका थिए ।
यस्तोमा ट्वीटरले स्पाम र फेक अकाउन्टको जानकारी उपलब्ध गराउन असफल भएको भन्दै मस्कले नियामकलाई पत्र पठाएका छन् ।
नियामकलाई पठाइएको पत्रमा स्पाम अकाउन्ट मेजरमेन्ट आफैंले गर्न पाउनुपर्ने भन्दै जानकारी उपलब्ध गराउनुपर्ने दावी उनको छ ।
यसअघि मार्चमा उनले ट्वीटरले स्पाम र फेक अकाउन्टको जानकारी उपलब्ध नगराउँदासम्म ट्वीटरको डिल होल्डमा राखिने बताएका थिए । तर, अब भने खरिद प्रक्रिया नै रद्द गर्न सक्ने चेतावनी दिएका छन् ।
उनले मर्ज तथा खरिद सम्झौतामा भएको सर्तहरु कम्पनीले पूरा गर्न नसकेको दावी गरेका छन् । उक्त सम्झौतामा स्पाम र फेक अकाउन्ट खरिद प्रक्रियाअघि खरिद गर्ने पक्ष आफैंले जाँच गर्नसक्ने सर्त राखिएको थियो ।
तर, कम्पनीले उक्त सर्त पूरा गर्न नसकेको जनाइएको छ ।
पछिल्लो अध्यावधिक: असोज २, २०७९ २२:३३
