काठमाडौं । एन्ड्रोइड १३ सार्वजनिक हुने मिति नजिकिँदैछ । गुगलले दिने अन्य ओएस अपडेटको तुलनामा एन्ड्रोइडमा खास धेरै नयाँ कुरा केही नहुने अनुमान गरिएको छ ।
एन्ड्रोइड १३ ले स्मार्टफोनको पर्फर्मेन्सलाई पहिलेको तुलनामा थप छिटो बनाउने अनुमान छ । एन्ड्रोइड १२ को अपग्रेडेड भर्सनमात्र हुने एन्ड्रोइड १३ को पर्खाइमा धेरै प्रयोगकर्ता छन् ।
गुगलका अनुसार एन्ड्रोइड १३ यही अगस्ट वा सेम्टेम्बरसम्ममा सार्वजनिक हुनेछ ।
सार्वजनिकपछि यो अपडेट सबैभन्दा पहिला पिक्सेल स्मार्टफोन र यसपछि सामसङ, ओप्पो लगायत अन्य एन्ड्रोइड फोनहरूमा पनि उपलब्ध हुनेछ ।
यसबीच केही मोबाइल कम्पनीले आफ्ना कुन-कुन मोडलले एन्ड्रोइड १३ पाउने र नपाउने कुरा सार्वजनिक गरिसकेका छन् भने केही कम्पनीले अझै पनि केही जानकारी दिएका छैनन् ।
अहिलेसम्म प्राप्त जानकारी अनुसार तल उल्लेखित स्मार्टफोनमा एन्ड्रोइड १३ उपलब्ध हुनेछ ।
गुगल
कम्पनीले एन्ड्रोइड १३ सार्वजनिक हुने बित्तिकै सुरुमा पिक्सेलका फोनहरूमा उपलब्ध हुने बताइसकेको छ ।
यसको साथै गुगलले एन्ड्रोइड १३ पिक्सेल ४ सिरिजभन्दा पछाडिका स्मार्टफोनदेखि उपलब्ध हुने घोषणा गरेको छ ।
कम्पनीका अनुसार पिक्सेल ४, ४ एक्सएल, ४ ए, ४ए फाइभजीमा एन्ड्रोइड १३ उपलब्ध हुनेछ ।
त्यसैगरी पिक्सेल ५ र ६ को सिरिजमा पिक्सेल फाइभ, फाइभ ए, पिक्सेल ६, पिक्सेल ६ए र ६ प्रोले यो अपडेट पाउनेछन् ।
त्यसैगरी पिक्सेल ७ र ७ प्रो पनि एन्ड्रोइड १३ सहित सार्वजनिक हुनेछन् ।
सामसङ
पिक्सेलपछि एन्ड्रोइड १३ को अपडेट सामसङका स्मार्टफोनहरूमा उपलब्ध हुनेछ ।
एन्ड्रोइड १३ मा आधारित वन यूआई ५ को बेटा भर्सन अहिले नै सामसङका केही प्रयोगकर्ताले प्रयोग गरिरहेका छन् ।
हाललाई यो बेटा भर्सन ग्यालेक्सी एस २२ सिरिजका स्मार्टफोनहरूमा मात्र छ ।
औपचारिक रुपमा सार्वजनिक भइसकेपछि भने यो फोन सामसङका अधिकाशं स्मार्टफोनमा उपलब्ध हुनेछ ।
यो अपडेट सामसङका अन्य स्मार्टफोनभन्दा पनि फोल्डेबल स्मार्टफोनका साथै ट्याबलेटमा बढि उपयोगी हुने अनुमान छ ।
वनप्लस
वनप्लसले पनि एन्ड्रोइड १३ र अक्सिजन ओए १३ वनप्लस ८, वनप्लस नर्ड २ लगायत अन्य नयाँ मोडेलको स्मार्टफोनहरूमा उपलब्ध हुने घोषणा गरिसकेको छ ।
सार्वजनिक भएपछि सबैभन्दा सुरुमा वनप्लस १० प्रो र वनप्लस १०टी मा एन्ड्रोइड १३ र अक्सिजन ओएस १३ उपलब्ध हुने बताइएको छ ।
यसपछि मात्र वनप्लसका अन्य स्मार्टफोनले एन्ड्रोइड १३ को अपडेट पाउनेछन् ।
साओमी, ओप्पो र रियलमी
हाल साओमीले साओमी १२, १२ प्रो र मि प्याड ५ मा र ओप्पोले फाइन्ड एन र फाइन्ड एन एक्समा एन्ड्रोइड १३ को परीक्षण गरिरहेका छन् ।
रियलमीले भने हाल जीटी २ प्रो मोडेलमा एन्ड्रोइड १३ को बेटा भर्सन उपलब्ध गराएको छ ।
यद्यपि यो कम्पनीले भने आफ्नो कुन-कुन मोडेलमा एन्ड्रोइड १३ उपलब्ध हुन्छ भन्ने विषयमा केही जानकारी दिएको छैन ।