आजदेखि राइड शेयरिङ सेवामा ५ प्रतिशत भ्याट लागु

काठमाडौं । राइड शेयरिङ सेवामा आज शुक्रबार (१ साउन) देखि ५ प्रतिशत मूल्य अभिवृद्धि कर (भ्याट) लागु भएको छ । आर्थिक ऐन, २०८३ अनुसार लागु भएको व्यवस्थाअनुसार अब पठाओ, इनड्राइभ, याङ्गोजस्ता प्लेटफर्ममार्फत प्रदान गरिने राइड शेयरिङ सेवामा ५ प्रतिशत भ्याट लाग्नेछ ।

आन्तरिक राजस्व विभागले सूचना जारी गर्दै राइड शेयरिङ प्लेटफर्मलाई आजदेखि भ्याट कार्यान्वयन गर्न निर्देशन दिएको छ । विभागका अनुसार राइड शेयरिङ प्लेटफर्मले आफ्नो प्लेटफर्ममा आबद्ध राइडरले यातायात तथा ढुवानी सेवा बापत लिने शुल्कको ५ प्रतिशत भ्याट सङ्कलन गर्नुपर्नेछ । सङ्कलित कर र त्यसको विवरण प्रत्येक महिना समाप्त भएको २५ गतेभित्र सम्बन्धित राजस्व कार्यालयमा बुझाउनुपर्नेछ ।

तर चालकले भने व्यक्तिगत रूपमा भ्याटमा दर्ता हुनुपर्ने छैन । उनीहरूका लागि स्थायी लेखा नम्बर (प्यान) भने अनिवार्य गरिएको छ । यसअघि सरकारले आर्थिक वर्ष २०८३/८४ को बजेटमार्फत राइड शेयरिङ सेवालाई मूल्य अभिवृद्धि करको दायरामा ल्याउने घोषणा गरेको थियो । सोहीअनुसार यो व्यवस्था कार्यान्वयनमा आएको हो ।

 

पछिल्लो अध्यावधिक: साउन १, २०८३ १४:४

टिप्पणीहरू