सामाजिक सञ्जालमा गौशाला २६ को पहिचान खुलाउने रास्वपा कार्यकर्ता निलम्बित
पुस २६, २०८० १४:१९
काठमाडौं । राष्ट्रिय स्वतन्त्र पार्टी (रास्वपा)ले गौशाला २६ को फोटो सार्वजनिक गर्ने आफ्ना एक सदस्यलाई निलम्बन गरेको छ ।
बलात्कार आरोपमा दोषी ठहर भएका क्रिकेटर सन्दीप लामिछानेबाट पीडित गौशाला २६ भन्दै सामाजिक सञ्जाल एक्समा फोटो राख्ने रास्वपा प्रवास नेपाली सम्पर्क विभाग जापान च्युबू शाखा समितिका सदस्य दिवस सापकोटालाई पार्टीले बिहीवार पदीय जिम्मेवारीबाट निलम्बन गरेको हो ।
रास्वपाले विज्ञप्ति प्रकाशित गर्दै सापकोटालाई निलम्बन गरेको जानकारी दिएको छ ।
“सामाजिक सञ्जाल प्रयोगमा संवेदनशील नरहेको भन्दै रास्वपाले प्रवास नेपाली सम्पर्क विभाग जापान च्युबू शाखा समितिका सदस्य दिवस सापकोटालाई पदीय जिम्मेवारीबाट निलम्बन गरेको जानकारी गराउँदछौं,” विज्ञप्तिमा भनिएको छ, “सापकोटाले गौशला-२६ (परिवर्तित नाम)को तस्वीर सामाजिक सञ्जाल (X) मा पोस्ट गर्दै अदालती फैसलासँग जोडेर पीडितप्रति कटाक्ष गरेका थिए ।”
पछिल्लो अध्यावधिक: पुस २६, २०८० १५:१२
