यसरी तपाईंको पुरानो आईफोनलाई फास्ट र लामो समयसम्म चल्ने बनाउँदैछ एप्पल
असार ३, २०८३ १४:१३
काठमाडौं । यो वर्षको अन्त्यतिर आईओएस २७ डाउनलोड गरेपछि तपाईंको पुरानो आईफोन अझ बढी छिटो र राम्रो चलेको महसुस हुनेछ । कम्तीमा एप्पलको दाबी यही छ । यस वर्षको डब्लूडब्लूडीसीमा कम्पनीले आफ्नो आगामी मोबाइल अपरेटिङ सिस्टम अपडेटले धेरै वटा प्लेटफर्म स्थिरता सुधारहरू ल्याउने बताएको हो । यसले गर्दा सन् २०१९ को आईफोन ११ सम्मका पुराना डिभाइसहरू पनि अलि राम्रोसँग चल्नेछन् ।
यसमा सुधारहरूको लामो सूची नै छ । जस्तै छिटो पीडीएफ सेभ हुनेदेखि लिएर लो पावर मोडमा क्यामेरा छिटो खुल्नेसम्म । एप खुल्ने गति ३० प्रतिशतसम्म छिटो भएको छ-जुन आईफोन ११ प्रो म्याक्समा परीक्षण गरिएको थियो । त्यस्तै, एयरड्रप फाइल ट्रान्सफर ८० प्रतिशतसम्म छिटो भएको छ । यो फिचर आईफोन १६ प्लसमा परीक्षण गरिएको हो र फोटो खिचेपछि आफ्नो फोटो लाइब्रेरीमा जाँदा तस्बिरहरू ७० प्रतिशतसम्म छिटो लोड हुनेछन् । जुन आईफोन १५ मा परीक्षण गरिएको छ ।
यसबाहेक, आईफोन अब सेलुलर र वाई-फाई नेटवर्कहरूबिच स्विच गर्ने कुरामा अझ बढी स्मार्ट हुनेछ । एप्पलले स्पटलाइट, फोटोज र मेलमा सर्चले काम गर्ने प्रणालीलाई पनि पूर्ण रूपमा रिडिजाइन गरेको छ । यसको अर्थ अब तपाईंले जे खोजिरहनुभएको छ, त्यो पहिलो प्रयासमै ठ्याक्कै देख्न पाउनुहुनेछ ।
यीमध्ये केही सुधारहरू आईफोनको सीपीयू शेड्युलरमा गरिएको अप्टिमाइजेसनका कारण सम्भव भएका हुन् । यो अपरेटिङ सिस्टमको एउटा यस्तो मानक भाग हो, जसले सीपीयूको लागि कामको समन्वय गर्छ । यसले एप तथा सेवाहरूको ट्राफिक फ्लोलाई व्यवस्थापन गर्छ ताकि तपाईंले आफ्नो आईफोनमा गरिरहनुभएको मुख्य काम-जसमा तपाईंको ध्यान केन्द्रित छ-सहज र छिटो चल्न सकोस् ।
एप्पलको सबैभन्दा एड्भान्स सीपीयू शेड्युलर यसका पछिल्ला डिभाइसहरूमा छ । तर डेभलपर टोलीले ती धेरै आधुनिक एल्गोरिदम प्रविधिहरूलाई आईओएस २७ मार्फत आईफोन ११ सम्म ल्याएको छ ।
पुराना उपकरणहरूलाई सकेसम्म लामो समयसम्म अपडेट राखिरहनु एप्पलको आफ्नै व्यावसायिक हितमा पनि छ । अनुसन्धान फर्म आईडीसीका डेटा र एनालिटिक्सका उपाध्यक्ष फ्रान्सिस्को जेरोनिमोले द वायरसँग भनेका छन् कि उपभोक्ताहरू आफ्नो स्मार्टफोन अपग्रेड (नयाँ मोडेल किन्न) गर्न बाध्य भएको महसुस गर्न चाहँदैनन् । यदि उनीहरूले आफ्नो डिभाइसलाई लामो समयसम्म चलाउन सक्छन् भने, यसले उनीहरूको चिन्ता कम गर्छ र पैसाको उचित मूल्य पनि दिन्छ । विशेष गरी आजभोलि मानिसहरूले पहिले भन्दा धेरै पैसा स्मार्टफोनमा खर्च गरिरहेका छन् ।
"यो आईओएस र एन्ड्रोइड बिचको एउटा ठुलो भिन्नता हो," जेरोनिमो भन्छन् । "किनभने उपभोक्ताहरूलाई अब थाहा छ कि यदि उनीहरूले आईओएस डिभाइस किने भने, यो लामो समयसम्म टिक्छ र उनीहरूले अपग्रेड गर्ने निर्णय गर्दा पनि यसले आफ्नो मूल्य (Resale value) कायम राख्छ । तर एउटा एन्ड्रोइड डिभाइस-ब्रान्ड हेरेर दुई वा तीन वर्षपछि उनीहरूले थप अपडेटहरू पाउन सक्ने छैनन् । अपग्रेड गर्न चाहेमा त्यसको मूल्य घट्नेछ र उनीहरूले यसलाई बढी मूल्यमा बेच्न सक्ने छैनन् ।"
एप्पलले सामान्यतया आफ्ना उपकरणहरूलाई ६ देखि ७ वर्षसम्म सपोर्ट दिन्छ । जबकि गुगल र सामसङ जस्ता केही निश्चित एन्ड्रोइड फोन निर्माताहरूले मात्र त्यस्तो स्तरको सपोर्ट दिने वाचा गरेका छन् ।
यदि मानिसहरूले आफ्नो फोन लामो समयसम्म राख्छन् भने, डिभाइसलाई अपडेट राखिदिँदा ती ग्राहकहरूलाई एप्पलका अन्य उत्पादनहरू किन्न पनि बाटो खुल्छ । जेरोनिमो भन्छन्, "हुनसक्छ उनीहरूले आफ्नो फोनलाई पूरक बनाउन एप्पल वाच वा एयरपड्स किन्नेछन् ।"
एप्पलका लागि अझ महत्त्वपूर्ण कुरा त के छ भने, यसले गर्दा कम्पनीका धेरै सेवाहरू-जस्तै फिटनेस प्लस, एप्पल टिभी, एप्पल म्युजिक र अन्यको सब्सक्रिप्सन लिन ग्राहकहरूलाई उच्च प्रोत्साहन मिल्छ । एप्पलले आफ्नो सेवा व्यवसायले ३१ अर्ब डलरको ऐतिहासिक आम्दानीको रेकर्ड राखेको कुरा गत अप्रिलमा मात्रै सार्वजनिक गरेको थियो ।
"यदि उनीहरूले आईफोन ११ लाई सपोर्ट गर्न नसकेका भए पनि कसैले उनीहरूको आलोचना गर्ने थिएन," जेरोनिमो भन्छन् । "तर उनीहरू स्पष्ट रूपमा आफ्ना सबै डिभाइसहरूलाई सपोर्ट दिन चाहन्छन् । किनभने उनीहरूलाई थाहा छ कि ब्रान्ड भ्यालुको सन्दर्भमा यसको ठुलो अर्थ छ र उपभोक्ताहरूले उनीहरूको उत्पादन किन्दा ती लामो समय टिक्छन् भन्ने जान्नु निकै महत्त्वपूर्ण कुरा हो ।"
तर यसमा एउटा सर्त के छ भने, यी पुराना आईफोनहरूले सपोर्ट पाए तापनि तिनीहरूले आईओएस २७ मा आउन लागेका धेरै नयाँ मुख्य फिचरहरूको भने फाइदा लिन सक्ने छैनन् । एप्पल इन्टेलिजेन्सका सबै सुविधाहरू-जसमा एकदमै नयाँ सिरी एआई अनुभव समावेश छ । जसले भ्वाइस असिस्टेन्टलाई साँच्चिकै उपयोगी बनाउने दाबी गर्छ । केवल आईफोन १५ प्रो वा त्यो भन्दा नयाँ फोनहरूमा मात्र यस्ता फिचर उपलब्ध हुनेछन् । त्यसैले यदि तपाईं अझ स्मार्ट सिरी चाहनुहुन्छ वा आफ्नो फोटोहरूलाई एआईको प्रयोग गरेर सजाउन चाहनुहुन्छ भने, तपाईंले अन्ततः नयाँ फोनमा अपग्रेड गर्नैपर्ने हुन्छ ।
पछिल्लो अध्यावधिक: असार ३, २०८३ १४:१४
