राइड शेयरिङ चालकले अब प्यान नम्बर लिएर मात्र कारोबार गर्न पाउने

काठमाडौं । आन्तरिक राजस्व विभागले राइड शेयरिङ सेवामा आबद्ध चालकहरूका लागि स्थायी लेखा नम्बर (प्यान) अनिवार्य गरेको छ । एक सूचना जारी गर्दै विभागले राइड शेयरिङ प्लेटफर्ममा आबद्ध भएर सेवा प्रदान गर्ने व्यक्तिले अनिवार्य रूपमा प्यान लिएर मात्र कारोबार गर्न निर्देशन दिएको हो । 

विभागका अनुसार आयकर ऐन, २०५८ को दफा ७८ तथा आयकर नियमावली, २०५९ को नियम २३ ले निर्धारणयोग्य आय आर्जन गर्न चाहने व्यक्तिले स्थायी लेखा नम्बर लिनुपर्ने व्यवस्था गरेको छ । यस्तै, भुक्तानीमा कर कट्टी गर्नुपर्ने कुनै पनि व्यक्तिले त्यस्तो आय आर्जन गर्नु वा कर कट्टी गर्नु अगावै प्यान लिनुपर्ने कानुनी प्रावधान रहेको छ । 

विभागले राइड शेयरिङ प्लेटफर्म सञ्चालन गर्ने कम्पनीमा आबद्ध भई सेवा दिने व्यक्तिलाई लक्षित गर्दै यो सूचना जारी गरेको हो । सूचनामा भनिएको छ, “राइड शेयरिङ सेवा सञ्चालन गर्ने कुनै व्यक्ति (राइड शेयरिङ अपरेटर) को प्लेटफर्ममा आबद्ध भई सेवा प्रदान गर्ने व्यक्तिले अनिवार्य रूपमा स्थायी लेखा नम्बर लिएर मात्र कारोबार गर्नु/गराउनु हुन सरोकारवाला सबैको जानकारीका लागि यो सूचना प्रकाशित गरिएको छ ।”

सरकारले आर्थिक विधेयक २०८३ मार्फत आयकर ऐनको दफा ९५ मा संशोधन गर्दै राइड शेयरिङ सेवामा अग्रिम कर असुल गर्नुपर्ने व्यवस्था ल्याएको छ । आर्थिक विधेयकमा भनिएको छ, ‘बासिन्दा राइड शेयरिङ सेवा सञ्चालन गर्ने व्यक्ति (राइड शेयरिङ अपरेटर)ले आफ्नो प्लेटफर्ममा आबद्ध भई कुनै सेवा प्रदान गर्ने प्राकृतिक व्यक्तिलाई प्रदान गरेको सेवाबापतको रकमको एक प्रतिशतका दरले अग्रिम कर असुल गर्नुपर्नेछ ।’

पछिल्लो अध्यावधिक: असार ३२, २०८३ १७:४६

टिप्पणीहरू