रेडिटको नक्कल गर्दै मेटाले गुपचुपमै सार्वजनिक गर्यो नयाँ एप 'फोरम'
जेठ ९, २०८३ २०:४
काठमाडौँ । मेटा कम्पनीले फेसबुक ग्रुप्सका लागि फोरम (Forum) नामक एउटा नयाँ छुट्टै (standalone) एप गोप्य रूपमा सार्वजनिक गरेको छ । यो एपलाई रेडिटसँग मिल्दोजुल्दो प्लेटफर्मको रूपमा प्रस्तुत गरिएको छ ।
जसलाई मेटाले गहन छलफल, वास्तविक जवाफ र तपाईंले मन पराउने समुदायहरूका लागि निर्माण गरिएको विशेष ठाउँ भनेर वर्णन गरेको छ । प्रयोगकर्ताहरूले आफ्नो फेसबुक अकाउन्ट प्रयोग गरेरै फोरममा साइन-इन गर्न सक्छन् ।
साइन-इन गरेपछि यसले प्रयोगकर्ताका सबै फेसबुक ग्रुपहरू, प्रोफाइल र गतिविधिहरू स्वचालित रूपमा लोड गर्दछ । यसमा फेसबुकको मुख्य एपमा जस्तै निकनेम (उपनाम) प्रयोग गरेर पोस्ट गर्न सकिने सुविधा छ ।
फोरममा शेयर गरिएका सबै कुराहरू फेसबुकमा पनि देखिनेछन् र प्रयोगकर्ताका ग्रुपहरू फेसबुकमा पनि कायमै रहनेछन् । यसको फिड कुराकानीमा केन्द्रित छ, जसले गर्दा प्रयोगकर्ताहरूले ट्रेन्डिङ विषय मात्र नभई वास्तविक मानिसहरूले के भनिरहेका छन् भन्ने कुरा देख्न सक्छन् ।
एपमा एउटा आस्क (Ask) ट्याब छ, जहाँ प्रयोगकर्ताहरूले प्रश्न सोध्न सक्छन् । एआईले विभिन्न फेसबुक ग्रुपहरूमा भएका छलफलहरूबाट जानकारी सङ्कलन गरेर उत्तर दिनेछ । यो गुगलको एआई ओभरभ्यु जस्तै देखिन्छ ।
यसका साथै ग्रुप एड्मिनहरूलाई कन्टेन्ट मोडरेसन र ग्रुप व्यवस्थापनमा मद्दत गर्न एआई एड्मिन असिस्टेन्ट पनि राखिएको छ । यसमा प्रयोगकर्ताले आफू सहभागी भएका ग्रुपहरूका साथै रेडिटको फिडमा जस्तै नयाँ ग्रुपहरूका सुझावहरू पनि पाउनेछन् । यसमा एउटा मिनी फेसबुक प्रोफाइल पनि छ, जसमा प्रयोगकर्ताले ग्रुपहरूमा गरेका पोस्टहरू मात्र देखिन्छन् ।
मेटाले धेरै नयाँ एपहरू सार्वजनिक गर्ने आफ्नो बृहत्तर योजना अन्तर्गत फोरम ल्याएको हो । भर्खरै मात्र कम्पनीले इन्स्ट्यान्ट्स (Instants) नामक एप पनि सार्वजनिक गरेको थियो । जसले इन्स्टाग्रामका साथीहरूसँग हराएर जाने (disappearing) फोटोहरू शेयर गर्ने अनुमति दिन्छ ।
वाल स्ट्रिट जर्नलका अनुसार सीईओ मार्क जुकरबर्गले एआईको कार्यक्षमता प्रयोग गरेर धेरै एपहरू निर्माण गर्ने लक्ष्य राखेका छन् । जसमा ५० वटासम्म नयाँ एपहरू बनाउने सम्भावनाबारे छलफल भएको छ ।
मेटाले पहिले पनि २०१४ मा ग्रुप्स नामक छुट्टै एप ल्याएको थियो । तर त्यसलाई २०१७ मा नै बन्द गरिएको थियो । अहिलेको फोरम एपलाई त्यसैको एउटा परिष्कृत र एआईद्वारा सक्षम पुनर्जन्म मानिएको छ ।
यद्यपि आलोचकहरूले मेटाले प्रायः अन्य लोकप्रिय सेवाहरूको नक्कल गर्ने गरेको टिप्पणी गरेका छन् । जस्तै: इन्स्ट्यान्ट्सले बि-रियल र स्न्यापच्याटको नक्कल गरेको र मेटा एडिट्सले क्यापकटको नक्कल गरेको आरोप लाग्ने गरेको छ । फोरमले पनि रेडिट र गुगलको एआई सर्च प्रणालीको केही अंशहरू अपनाएको देखिन्छ ।
मेटाकी कम्युनिकेसन म्यानेजर फेरियल हेमामदाले यो एपको सुरुवातको पुष्टि गर्दै प्रयोगकर्ताहरूका लागि कुन कुरा रोचक र उपयोगी हुन्छ भनेर हेर्नका लागि कम्पनीले सार्वजनिक रूपमा नयाँ उत्पादनहरूको परीक्षण गरिरहने बताएकी छिन् ।
पछिल्लो अध्यावधिक: जेठ ९, २०८३ २०:४
