खुला शिक्षा पद्धतिबाट आईटी पढ्न चाहनेहरूका लागि भर्ना प्रक्रिया सुरु, अनलाइन आवेदन दिन सकिने

काठमाडौं । ललितपुरस्थित नेपाल खुला विश्वविद्यालयले शैक्षिक सत्र २०८३ का लागि 'ब्याचलर इन इन्फर्मेसन टेक्नोलोजी' (बीआईटी) सहित स्नातक तहका विभिन्न शैक्षिक कार्यक्रममा नयाँ विद्यार्थी भर्ना आह्वान गरेको छ ।

विश्वविद्यालयको विज्ञान, स्वास्थ्य तथा प्रविधि संकायअन्तर्गत सञ्चालित चार वर्षे अवधिको आठ सेमेस्टर प्रणालीमा आधारित बीआईटी कार्यक्रममा भर्ना हुन चाहने विद्यार्थीहरूका लागि आवेदन खुला गरिएको हो ।

कार्यक्रममा भर्ना हुन इच्छुक आवेदकले आगामी १८ साउनसम्म अनलाइनमार्फत आवेदन फाराम भर्न सक्नेछन् । २१ असारदेखि नै सुरु भइसकेको यस आवेदन प्रक्रियाका लागि एक हजार रुपैयाँ शुल्क निर्धारण गरिएको छ ।

आवेदन फाराम भरेका विद्यार्थीको प्रवेश परीक्षा साउनको चौथो हप्तादेखि सञ्चालन गर्ने कार्यतालिका विश्वविद्यालयले तय गरेको छ ।

प्रवेश परीक्षामा सफल भएका विद्यार्थीहरूको भर्ना प्रक्रिया भदौको दोस्रो हप्तादेखि सुरु गरिनेछ । विश्वविद्यालयले सबै प्रक्रिया पूरा गरी भदौको चौथो हप्तादेखि नियमित पठनपाठन सुचारु गर्ने योजना राखेको छ ।

बीआईटीका अतिरिक्त विश्वविद्यालयले सामाजिक शास्त्र तथा शिक्षा संकायअन्तर्गत बीए, एक वर्षे बीएड र पुस्तकालय विज्ञानमा डिप्लोमा तथा व्यवस्थापन र कानुन संकायतर्फ एलएलबी र बीबीए विषयमा पनि भर्ना खुलाएको छ ।

सूचना प्रविधिको क्षेत्रमा भविष्य बनाउन चाहने र खुला शिक्षा पद्धतिबाट अध्ययन गर्न इच्छुक विद्यार्थीहरूले विश्वविद्यालयको वेबसाइटमार्फत थप जानकारी लिन सक्नेछन् ।

 

पछिल्लो अध्यावधिक: असार १८, २०८३ १०:३६

टिप्पणीहरू