एन्ड्रोइडको अटोकरेक्टले मोबाइल टाइपिङ बिग्रिने समस्या छ ? यस्तो छ सुधार्ने स्मार्ट तरिका

काठमाडौं । यदि तपाईंलाई एन्ड्रोइडको अटोकरेक्ट त्यति राम्रो छैन जस्तो लाग्छ भने, तपाईंले यो कुरा जान्नैपर्छ कि तपाईंले नजानेर दुःख पाइरहनु भएको छ । तपाईंलाई थाहा नहुन सक्छ, तर जीबोर्डमा Personal Dictionary (व्यक्तिगत शब्दकोश) भनिने एउटा फिचर छ, र यो फिचर प्रयोग गरेर तपाईंले आफ्नो टाइपिङ अनुभवलाई पहिलेभन्दा धेरै राम्रो बनाउन सक्नुहुन्छ ।

तपाईंले आफ्नो फोन प्रयोग गर्ने शैली अनुरूप आफ्नो Personal Dictionary लाई कस्टमाइज गर्न सम्भव छ । यसमा गुगललाई थाहा नभएका नयाँ शब्दहरू थप्ने, गलत अटोकरेक्टहरूलाई सच्याएर भविष्यमा हुन नदिने, वा ईमेल र फोन नम्बरहरू जस्ता कुराहरू टाइप गर्न अझ सजिलो बनाउन आफ्नै कस्टम टेक्स्ट शर्टकट तयार पार्ने जस्ता कुराहरू समावेश छन् ।

यहाँ हामी तपाईंलाई एन्ड्रोइड फोनहरूमा Personal Dictionary कसरी खोल्ने र आफ्नो कामलाई सजिलो बनाउन त्यहाँ भएका इनपुटहरूलाई कसरी कस्टमाइज गर्ने भन्ने तरिका बताउँदै छौं ।

- सबैभन्दा पहिला जीबोर्डको सेटिङमा जानुहोस् । यसका लागि कुनै पनि एपमा जीबोर्ड खोल्नुहोस् र फोनको माथि बायाँपट्टि रहेको चार थोप्ला जस्तो मेनु आइकनमा ट्याप गर्नुहोस् र Settings मा थिच्नुहोस् ।

- अब Dictionary हुँदै Personal dictionary मा ट्याप गर्नुहोस् र आफ्नो रोजाइको भाषा छान्नुहोस् । यहाँ हामीले नेपाली (नेपाल) छानेका छौं ।

- यति गरिसकेपछि आफ्ना शब्दहरू थप्न सक्नु हुन्छ । नयाँ शब्द थप्नका लागि तपाईंले माथि दायाँपट्टि रहेको + आइकनमा ट्याप गर्नुपर्ने हुन्छ, र सबैभन्दा माथिल्लो पङ्क्तिमा आफ्नो शब्द टाइप गर्नुहोस् । यदि तपाईं शर्टकट थप्न चाहनुहुन्छ भने, त्यसलाई तलको पङ्क्तिमा राख्न सक्नु हुन्छ । यहाँ हामीले हाम्रो आधिकारिक वेबसाइट थपेका छौं, र त्यसलाई बारम्बार टाइप गरिरहनु नपरोस् भनेर 'ट' शर्टकट राखेका छौँ ।

सबै कुरा सही रूपमा प्रविष्ट गरिसकेपछि, अघिल्लो पेजमा फर्कन Back (ब्याक) बटनमा ट्याप गर्नुहोस् ।

- यसरी आफ्ना नयाँ शब्दहरू थप्नुहोस् र टाइप गर्नुपर्ने कुनै पनि एपमा गएर आफ्ना नयाँ शब्दहरू परीक्षण गर्नुहोस् । यसले सिधै तपाईंका कस्टम शब्दहरू आफैं थप्ने छैन, बरु ती शब्दहरू जीबोर्ड को माथिल्लो भागमा रहेको अटोकरेक्ट बक्समा देखा पर्नेछन् ।

- आफ्नो डिक्सनरी एक्सपोर्ट गर्न पनि सक्नु हुन्छ । अन्यथा तपाईंले कहिल्यै जीबोर्ड डिलिट गर्नुभयो वा क्याश क्लियर गर्नुभयो भने, तपाईंले आफ्नो कस्टम किबोर्डको पहुँच गुमाउनुहुनेछ । त्यसैले यसको ब्याकअप राख्नु बुद्धिमानी हुन्छ ।

यसका लागि माथि दायाँपट्टि रहेको तीनवटा थोप्ला भएको आइकनमा ट्याप गर्नुहोस्, र एक्सपोर्ट (Export) चयन गर्नुहोस् । तपाईंलाई कुन डिफल्ट विकल्प छान्ने भनेर सोधिनेछ, हामीले यहाँ Google Drive रोजेका छौं । यति गरिसकेपछि अगाडि बढ्न स्क्रिनमा देखिएका निर्देशनहरू पालना गर्नुहोस् ।

- यदि तपाईंलाई फेरि कहिल्यै आफ्नो डिक्सनरी जीबोर्डमा इम्पोर्ट गर्नुपर्‍यो भने, तपाईंले त्यो ब्याकअपलाई निकै सजिलै इम्पोर्ट गर्न सक्नुहुन्छ । यसका लागि तीनवटा थोप्ला भएको आइकनमा ट्याप गर्नुहोस् र इम्पोर्ट (Import) चयन गर्नुहोस् । त्यसपछि तपाईंले सही फाइल खोजेर त्यसमा ट्याप गर्नुपर्ने हुन्छ ।

यस क्रममा जीबोर्डले गुगल ड्राइभमा सही फाइल फेला पार्न सकेन भने ब्याकअपलाई सिधै आफ्नो फोनमा डाउनलोड गर्न पनि सक्नु हुन्छ ।

यसरी अब तपाईंसँग गुगल र यसको किबोर्डलाई थाहा नहुने शब्दहरू र शर्टकटहरूले भरिपूर्ण आफ्नै व्यक्तिगत शब्दकोश तयार हुन्छ ।

यसको अर्थ हो, अर्को पटक जब तपाईंले सिकेका कुनै पनि नौला शब्द वा वाक्यांशहरू टाइप गर्न खोज्दा अटोकरेक्टले स्वचालित रूपमा तिनलाई तपाईंको वाक्यको सन्दर्भभन्दा पुरै फरक र बुझ्नै नसकिने शब्दमा परिवर्तन गर्ने छैन ।

 

पछिल्लो अध्यावधिक: असार १५, २०८३ १२:५५

टिप्पणीहरू