शिक्षा अधिकृतमाथि मोबिल छ्याप्ने वडा सदस्य पक्राउ

काठमाडौं । घोराही उपमहानगरपालिकाका शिक्षा अधिकृत अजय बोहरामाथि गुडिरहेको मोटरसाइकलमै मोबिल खन्याएर दुर्व्यवहार गरेको भिडिओ भाइरल भएपछि वडा सदस्य पक्राउ परेका छन् । जिल्ला प्रहरी कार्यालय दाङले घोराही उपमहानगरपालिका वडा नं. १५ का वडा सदस्य ४२ वर्षीय उत्तम बुढाथोकीलाई सोमबार पक्राउ गरेको हो ।

२७ असार (शनिबार) बिहान घोराही-१५ स्थित पद्मोदय पब्लिक नमुना माध्यमिक विद्यालयको विद्यालय व्यवस्थापन समितिको निर्वाचन कार्यतालिका थियो । निर्वाचन समितिको तर्फबाट मतदान अधिकृतका रूपमा खटिएका उपमहानगरका शिक्षा अधिकृत अजय बोहोरा आफ्नो रा १ ब १०४२ नम्बरको सरकारी मोटरसाइकलमा जाँदै थिए । सोही क्रममा वडा सदस्य बुढाथोकीले उनलाई बीच बाटोमै रोकी निर्वाचन नरोकेको झोकमा शरीरभरि मोबिल खन्याइ दिएका थिए ।

गुडिरहेको मोटरसाइकलमा सरकारी कर्मचारीमाथि भएको अमानवीय व्यवहारको उक्त भिडिओ सामाजिक सञ्जालमा भाइरल भएको थियो । उक्त घटनापछि पीडित शिक्षा अधिकृत बोहराले प्रहरीमा उजुरी दिएका थिए । सोही उजुरीका आधारमा असार २८ गते बुढाथोकीविरुद्ध ‘अपमानजनक तथा अमानवीय व्यवहार सम्बन्धी कसुर’मा मुद्दा दर्ता भएको थियो ।

मुद्दा दर्ता भएलगत्तै दाङ जिल्ला अदालतबाट पक्राउ पुर्जी जारी भएको प्रहरीले आरोपी बुढाथोकीको खोजी कार्य अघि बढाएको थियो । सो क्रममा सोमबार  बिहान घोराही-१५ मा लुकीछिपी बसेको अवस्थामा बुढाथोकीलाई नियन्त्रणमा लिइएको जिल्ला प्रहरी कार्यालय दाङका सूचना अधिकारी एवं प्रहरी नायब उपरीक्षक (डीएसपी) डा. हेमबहादुर केसीले जानकारी दिए । उनीविरुद्ध म्याद थपको काम भइरहेको उनले जानकारी दिए ।

पछिल्लो अध्यावधिक: असार २९, २०८३ १७:५०

टिप्पणीहरू