आन्तरिक रूपमा सुरु भयो टेलिकमको ई–सिम, आगामी हप्ता आम प्रयोगकर्ता माझ आउने

काठमाडौं । सरकारी स्वामित्वको दूरसञ्चार कम्पनी नेपाल टेलिकमले आजबाट आफ्ना कर्मचारीलाई इन्टरनेटमा आधारित सिमकार्ड (ई–सिम) उपलब्ध गराउन थालेको छ । यसअघि नै आन्तरिक परीक्षण सफल भइसकेको ई-सिम सार्वजनिक गर्नु अघि कम्पनीले पहिलो चरणमा आफ्ना कर्मचारीलाई उपलब्ध गराएको हो ।

टेलिकमले हाल बजारमा उपलब्ध हुने प्लास्टिक तथा धातुबाट निर्मित चिप जडित कार्डको विकल्पमा मोबाइल तथा अन्य डिजिटल उपकरणमै ‘इम्बेड’ अर्थात् गाँस्न सकिने ई–सिम ल्याउन लागेको हो । “आजबाट कर्मचारीलाई ई–सिम उपलब्ध हुन थालेको छ,” टेलिकम स्रोतले टेकपानासँग भन्यो, “आगामी साताबाट सफ्ट लञ्चको रुपमा ई–सिम आम प्रयोगकर्तामाझ आउने छ । सफ्ट लञ्च भएको केही समय पश्चात मात्रै यसको व्यवसायिक सुरुवात हुनेछ ।”

यद्यपि टेलिकमले अघिल्लो साता नै यो सेवा सार्वजनिक गर्ने तयारी थालेको थियो । तर, कम्पनीको बोर्डलाई जानकारी गराउनु पर्ने भएकाले केही ढिलाई हुन पुगेको बताइएको छ । अघिल्लो साता टेलिकम बोर्डले ई–सिम सार्वजनिक गर्ने योजना अगाडि बढाउन अनुमति दिएसँगै आजबाट आन्तरिक रुपमा कर्मचारीबीच सेवा उपलब्ध गराउन थालिएको हो ।

टेलिकमका अनुसार आगामी साताबाट उपलब्ध हुने ई–सिमका लागि ग्राहक भौतिक रूपमै कार्यालयसम्म पुग्नु पर्नेछ । सुरुमा भौतिक उपस्थितिलाई नै मान्यता दिइए पनि क्रमशः अनलाइनमा रूपान्तरण गर्ने कम्पनीको योजना छ ।

पछिल्लो अध्यावधिक: असोज २, २०७९

टिप्पणीहरू