सिङ्गापुरको अदालतको फैसलाः भारतीय आईटी कम्पनी बाइजुका संस्थापक रबिन्द्रनलाई ६ महिनाको जेल सजाय
जेठ १४, २०८३ १४:७
काठमाडौँ । भारतीय एड-टेक कम्पनी बाइजुका संस्थापक बाइजु रबिन्द्रनलाई सिङ्गापुरको एक अदालतले अदालतको अवहेलना गरेको ठहर गर्दै ६ महिनाको जेल सजाय सुनाएको छ । सन् २०२४ को अप्रिलदेखि सम्पत्ति विवरण सार्वजनिक गर्न दिइएका अदालतका आदेशहरू पालना नगरेको भन्दै उनलाई उक्त सजाय दिइएको हो ।
अदालतले रबिन्द्रनलाई अधिकारीहरू समक्ष आत्मसमर्पण गर्न र ९० हजार सिङ्गापुर डलर कानुनी खर्च/जरिबाना तिर्न समेत आदेश दिएको छ । यसका साथै सम्बन्धित कम्पनीको शेयर होल्ड गर्ने संस्था बीआर इन्भेस्टको प्राइभेट लिमिटेडमा आफ्नो कानुनी स्वामित्व रहेको प्रमाणित गर्ने कागजातहरू अदालतमा पेस गर्न पनि निर्देशन दिइएको छ ।
यो मुद्दा कतारको सोभरिन वेल्थ फन्ड कतार इन्भेस्टमेन्ट अथोरिटीको सहायक कम्पनी कतार होल्डिङ्सले दायर गरेको थियो । कतार होल्डिङ्सले बाइजुले कर्मचारी कटौती गरिरहेको समयमा कम्पनीमा लगानी गरेको थियो ।
यस मुद्दामा कतार होल्डिङ्सको प्रतिनिधित्व ड्रिउ एन्ड नेपियरले गरेका थिए भने बाइजु इन्भेस्टमेन्ट्सको तर्फबाट फेर्भेन्ट चेम्बर्सले वकालत गरेका थिए ।
के भन्छन् बाइजु रबिन्द्रन ?
अदालतको आदेशबारे सामाजिक सञ्जाल एक्समार्फत प्रतिक्रिया दिँदै रबिन्द्रनले यो आदेशलाई प्रक्रियात्मक (procedural) विषय मात्र भएको बताएका छन् । उनले यसलाई कुनै ठगी, बेइमानी वा गलत कामको प्रमाणित फैसला नभई कागजात खुलासा गर्ने विवादसँग मात्र सम्बन्धित रहेको बताएका छन् ।
1/ For months, the lenders (including GLAS Trust and QIA), other stakeholders and us (the founders) have been in advanced settlement discussions. A settlement has been agreed in principle, with only minor residual issues left between certain parties - none involving me. As part…
— Byju Raveendran (@ByjuofBYJUS) May 27, 2026
रबिन्द्रनले कतार इन्भेस्टमेन्ट अथोरिटीको यस कदमलाई अनावश्यक दबाबको रणनीतिको संज्ञा दिएका छन् । उनका अनुसार हाल ऋणदाताहरू र संस्थापकहरूबिच विवाद समाधानका लागि विस्तृत छलफल भइरहेको छ र सैद्धान्तिक रूपमा सम्झौता भइसकेको छ ।
सम्झौता निष्कर्षको नजिक पुगेको संवेदनशील समयमा यस्तो एकतर्फी कानुनी कारबाही अगाडि बढाउनु निराशाजनक भएको उनले बताएका छन् । उनले आफूले सधैँ बाइजु, यसका कर्मचारी र विद्यार्थीहरूको हितमा इमानदारीपूर्वक काम गरेको र विवादित रकम व्यक्तिगत रूपमा नलिएको स्पष्ट पारेका छन् ।
बाइजुका वकिल क्लारेन्स लुनले अदालतको उक्त निर्णयविरुद्ध पुनरावेदन गर्ने र आदेश कार्यान्वयनमा रोक लगाउन माग गर्दै निवेदन दिने तयारी भइरहेको जानकारी दिएका छन् ।
कतार इन्भेस्टमेन्ट अथोरिटीको भनाइ
रबिन्द्रनको दाबीको खण्डन गर्दै कतार इन्भेस्टमेन्ट अथोरिटीका प्रवक्ताले यो कुनै दबाबको रणनीति नभएको स्पष्ट पारेका छन् । संस्थाले आफ्नो ऋण असुलीको प्रक्रियालाई निरन्तरता दिने र अहिलेको अवस्थामा कुनै पनि सम्झौता हुने सम्भावना नरहेको बताएको छ ।
साथै रबिन्द्रनले छलफलको गोपनीयता भङ्ग गरेको भन्दै अथोरिटीले असन्तुष्टि समेत व्यक्त गरेको छ ।
कुनै समय भारतको सबैभन्दा मूल्यवान् स्टार्टअप मानिएको बाइजु (जसको मातृ कम्पनी थिङ्क एन्ड लर्न हो) कोभिड-१९ महामारीपछिको समयमा गम्भीर आर्थिक सङ्कट, ऋणसम्बन्धी कानुनी विवाद र सञ्चालनमा उथलपुथलको सामना गरिरहेको छ । विश्वभरका लगानीकर्ताहरूले बाइजुसँग आफ्नो लगानी फिर्ताको माग गरिरहेका छन् ।
यसअघि अमेरिकाको एक अदालतले १.२ अर्ब डलरको ऋणको ठुलो हिस्सा लुकाएको भन्दै रबिन्द्रनलाई १ अर्ब डलरभन्दा बढी तिर्न आदेश दिएको थियो । तर सन् २०२५ को डिसेम्बरमा डेलावेयर अदालतले क्षतिपूर्तिको रकम सही तरिकाले निर्धारण नभएको भन्दै उक्त आदेशलाई उल्टाएको थियो र सन् २०२६ को जनवरीमा नयाँ चरणको सुनुवाइ सुरु गर्न आदेश दिएको थियो ।
सिङ्गापुर अदालतको यो नयाँ आदेश भने रबिन्द्रनका लागि विश्वव्यापी रूपमा चलिरहेका मुद्दाहरूमध्ये अहिलेसम्मकै सबैभन्दा गम्भीर व्यक्तिगत कानुनी झड्का मानिएको छ ।
पछिल्लो अध्यावधिक: जेठ १४, २०८३ १४:७
