एउटा त्यस्तो विशेषता, जसमा आईफोन १४ प्रो भन्दा आईफोन एक्स नै राम्रो

काठमाडौं । एप्पलले सुरुताका उत्पादन गरेको आईफोनको आकार ३.५ इन्च थियो । त्यसपछिका हरेक नयाँ सिरिजमा कम्पनीले फोनको आकार बढाउँदै लगेको छ ।

३.५ बाट चार इन्च । ४.७ बाट ५.८ इन्च । ६.१ इन्चबाट ६.७ इन्च । अहिले करिब सात इन्चसम्मको डिस्प्ले भएका आईफोन बजारमा उपलब्ध छन् । 

सामान्यतया साना हात भएका मान्छेहरूलाई ठूला आकारका फोन‍ समाउन अफ्ठ्यारो हुने गर्छ । कतिपयको एउटा हातले मात्र फोन चलाउने बानी हुन्छ ।

उनीहरूलाई पनि आकारमा ठूला फोन चलाउन गाह्रो हुन्छ । त्यसो त हातमा धेरै सामान बोकिरहँदा साना आकारका फोन चलाउन निकै सजिलो हुने गर्छ । यही ‘आकार’ले गर्दा आईफोन १४ प्रो भन्दा आईफोन एक्स राम्रो छ । 

 

५.८ इन्च : समात्न सजिलो आकार भएको फोन !

एप्पलले सन् २०१७ मा आईफोन ८, आईफोन ८ प्लससँगै आईफोन एक्स पनि लञ्च गरेको थियो । त्यसमा आईफोन ८ टच आईडी (touch ID) भएको अन्तिम फोन बन्यो ।

त्यस्तै पहिलो पटक बायोमेट्रिक्स (Biometrics) का लागि फेस आईडी प्रयोग भएको तर होम ‍बटन (home button) नभएको पहिलो फोन आईफोन एक्स बन्यो । 

त्यति बेला ४.७ इन्चको आईफोन ८, ५.५ इन्चको आईफोन ८  र ५.८ इन्च भएको आईफोन एक्स लञ्च भएका थिए । आईफोन एक्समा होम बटन नभएकाले स्क्रिनको भाग बढी थियो । 

स्टेनलेस (खिया नलाग्ने) स्टिल फ्रेम प्रयोग भएकाले आईफोन १४ प्रो अलि वजनदार छ । यसकारण प्रो फिचरहरू भए पनि लामो समयसम्म चलाउँदा हात गल्छ । एक हातले त समाउनै मुस्किल पर्छ ।

६.१ इन्च डिस्प्लेको सामसङ ग्यालेक्सी एस २३ मा आल्मुनियम फ्रेम प्रयोग गरिएकाले १४ प्रो को तुलनामा हलुको छ । अलि कम तौल भएको फोन खोज्नेहरूका लागि १४ प्रोको तुलनामा ग्यालेक्सी एस २३ राम्रो विकल्प हो ।

तर ग्यालेक्सी एस २३ पनि आकारमा ठूलै छ । एक हातले फोन चलाउन अलि सकसै पर्छ । एक हातले चलाउने, साना आकारका फोन मन पराउनेहरूका लागि ५.८ इन्च आकारको फोन उपयुक्त हुन्छ ।

आईफोन एक्सको आकारमा ५.८ इन्च भएकाले हातमा सजिलै बस्छ । हातमा धेरै सामान भएका बेलामा समेत फोन चलाउन गाह्रो हुँदैन ।

आधुनिक फोनहरू मध्ये उपयुक्त आकार भएको फोन आईफोन एक्स नै हो । लगभग यही आकारको आईफोन एक्सएस, आईफोन ११ प्रो आदि पनि चलाउन सजिलै छन् ।

 

मिनी आईफोन!

आकारमा साना फोन पनि उपलब्ध छन् । तर तिनमा प्रो फिचरहरू भनिए पनि अत्यन्तै कम पाइन्छन् ।

धेरै मेगापिक्सेल भएको फोन, धेरै स्टोरेज क्षमता भएको फोन र राम्रो प्रोसेसर भएको फोन चाहने हो भने प्रो मोडेलका फोनहरू लिनु नै राम्रो हुन्छ । त्यस्ता फोनहरूको आकार भने ठूलो हुन्छ ।

बजार नभएको कारण देखाउँदै एप्पलले आईफोन मिनीको उत्पादन बन्द गरेको छ । तर त्यस्तो नुहन सक्छ ।

५.४ इन्चको डिस्प्ले मन नपराउनेले ५.८ इन्च भने मन पराइरहेका हुन्छन् । अब यसलाई कसरी हेर्ने ? हुन त कागजमा ५.८ र ६.१ इन्चको फरक खासै देखिँदैन । तर वास्तविक प्रयोगमा दुवैको अनुभव भिन्न हुने गर्छ । 

साना आकारका फोन रुचाउनेका लगि एप्पलले सोही आकारमा प्रो मोडेल बनाए राम्रो हुने थियो । हुन त त्यस्ता फोनहरूमा क्यामेरा, प्रोसेर राम्रो राख्ने हो भने ब्याट्री लाइफ कम हुने सम्भावना रहन्छ ।

तर अहिले पनि एप्पलसँग आकारका हिसाबले थुप्रै विकल्प छन् । तर ५.८ इन्च आकार भएको फोन भने फेरि उत्पादन नगर्ने सोचमा एप्पल देखिन्छ । आईफोन १४ मा त्यो सम्भावना भए पनि एप्पलले अहिलेसम्म त्यसको कुनै सङ्केत दिएको छैन ।

पछिल्लो अध्यावधिक: चैत ५, २०७९ १८:५३

टिप्पणीहरू