धेरै डिजिटल कारोबार गर्ने भुक्तानी सेवा प्रदायकको रूपमा खल्ती सम्मानित
पुस १२, २०८० ११:२
काठमाडौं । नेपाल क्लियरिङ हाउस लिमिटेड (एनसीएचएल) को १५औं वार्षिकोत्सवको अवसरमा डिजिटल वालेट खल्तीलाई सबैभन्दा धेरै डिजिटल कारोबार गर्ने भुक्तानी सेवाप्रदायक (पीएसपी) को रूपमा सम्मानित गरिएको छ । गत पुस ८ मा आयोजित एक समारोहमा खल्तीलाई यो विधामा अवार्ड दिइयो ।
तत्काल सुरक्षित र भरपर्दो अनलाइन भुक्तानी सेवाहरू प्रदान गर्ने प्रतिबद्धताका साथ सञ्चालन भइरहेकाे खल्तीले अन्य सेवाप्रदायकलाई पछि पार्दै याे अवार्ड प्राप्त गरेकाे हाे ।
मोबाइल रिचार्ज, बिल भुक्तानी टिकेट बुकिङसहित सेवाहरूको विस्तृत श्रृंखलाको साथ वित्तीय समावेशीकरणलाई बढावा दिन आफूले अग्रणी भूमिका निर्वाह गरेको कम्पनीकाे भनाइ छ ।
खल्तीले पछिल्लो समय मुभी/इभेन्ट टिकेटिङ, क्यापिटल मार्केटको भुक्तानी, विभिन्न सरकारी सेवाहरूको भुक्तानीमा समेत काम गर्दै आइरहेको छ ।
सम्मानप्रति कृतज्ञता ज्ञापन गर्दै खल्तीका प्रमुख कार्यकारी अधिकृत विनय खड्काले अझै नवीनतम तथा सुविधाहरू ल्याई निर्वाध डिजिटल भुक्तानीका समाधानहरू प्रदान गर्ने प्रतिबद्धता व्यक्त गरे ।
पछिल्लो अध्यावधिक: पुस १२, २०८० ११:२
