दुबई प्रहरीले लखेटेपछि नेपालीसँग मिलेर क्रिप्टो कारोबार तथा अनलाइन ठगी गर्ने ३ विदेशीलाई जेल

 

काठमाडौं । नेपाल आई अवैध तरिकाले क्रिप्टो कारोबार गरेको आरोपमा पक्राउ परेका तीन विदेशी नागरिक पुर्पक्षका लागि जेल चलान भएका छन् । आइतबार ललितपुर जिल्ला अदालतका न्यायाधीश निर्मला योङयाको एकल इजलासले प्रतिवादी तीन विदेशी नागरिकलाई पुर्पक्षका लागि थुनामा राख्ने आदेश दिएको हो । 

थुनामा पर्नेमा चिनियाँ नागरिक डिङ जियाहोङ र लिन क्विन्जिन तथा फिलिपिनी नागरिक हेनिपा सिन्सुयात रहेका छन् । अभौतिक मुद्रा प्रयोग गर्न नहुने कसुर (मुद्रा सम्बन्धी) तथा सङ्गठित अपराध कसुर गरेको आरोपमा उनीहरूविरुद्ध २५ कात्तिकमा मुद्दा दर्ता भएको थियो । 

एकान्तकुना ललितपुर स्थित एक घर भाडामा लिइ केही व्यक्तिले अवैध तरिकाले कल सेन्टर सञ्चालन गरेको भन्ने सूचना पाएपछि केन्द्रीय अनुसन्धान ब्युरोले २६ भदौमा छापा हानेर उनीहरूलाई नियन्त्रणमा लिएको थियो । 

नेपालीसँग मिलेर तीन विदेशीले यसरी नेपालमा सञ्चालन गरेका थिए अवैध धन्दा

संयुक्त अरब इमिरेट्सको प्रहरीले अवैध रूपमा क्रिप्टोकरेन्सी कारोबार गरेको भन्दै २०८१ को सुरुवातमा चिनियाँ, फिलिपिनो र नेपाली नागरिकलाई उनीहरूको सम्बन्धित देशमा फिर्ता पठाइ दियो । उनीहरू सबै आआफ्नो देश फर्किए । 

तर, त्यहाँ काम गर्नेहरू सबै टेलिग्राम र ह्वाट्सएप मार्फत एक अर्कासँग जोडिएका थिए । केही समयको आरामपछि उनीहरू क्रिप्टो सम्बन्धी कामकै खोजीमा जुटे । 

त्यसैबिच उनीहरूले सोही प्रकृतिको काम नेपालमा सञ्चालन गर्ने योजना बुने । योजना अनुरूप भदौ २०८१ मा चिनियाँ नागरिक डिङ जियाहोङ र लिन क्विन्जिन नेपाल आए । उनीहरूको भाषा नेपालीले नबुझ्ने र नेपालीको भाषा उनीहरूले नबुझ्ने भएपछि दुबईमा उनीहरूसँगै काम गरेकी फिलिपिनो नागरिक हेनिपा सिन्सुयातलाई नेपाल बोलाइयो ।

त्यसपछि दुबईमा सँगै काम गर्ने १०० जनामध्ये ४७ जना नेपाली, दुई चिनियाँ नागरिक र एक फिलिपिनो नागरिक गरी ५० जनाले एउटा कम्पनी खोले । र, कम्पनी सञ्चालन गर्नका लागि ललितपुर महानगरपालिका वडा नं १३ एकान्तकुनाको एकता बस्तीमा रहेको जगदीश उपाध्यायको तीन तले घर भाडामा लिए । उनीहरूले घरको भाडा नै मासिक साढे तीन लाख रुपैयाँ दिने सम्झौता गरेका थिए ।

दुई चिनियाँ नागरिक सञ्चालक, एक फिलिपिनी नागरिक भाषा अनुवादक र पाँच नेपाली ग्रुप लिडरको रूपमा थिए । सुरुवातमा उनीहरूले हिंगे, बम्बल, मुसलिमा, इन्शाआह, सलाम, मज्, ओकेक्युपिड र अलखत्तबा लगायतका डेटिङ एपमा महिलाको नक्कली अकाउन्ट बनाउथे । र, जागिरका लागि राखिएका अन्य नेपालीलाई त्यही नक्कली अकाउन्टबाट कुरा गर्ने काम दिन्थे ।

उनीहरू ती डेटिङ एपबाट युरोप, अमेरिका, क्यानडा लगायतका विभिन्न देशका पुरुषलाई साथी बनाउनु पर्ने हुन्थ्यो । साथी बनाएर कुरा गर्दै घनिष्ठ मित्रताको सम्बन्ध बनाउथे । ‘साथीले भनेपछि जे पनि आँखा चिम्लेर गर्छु’ भन्ने स्तरको विश्वास कायम राख्थे । 

र, अनलाइन प्लेटफर्म ह्याशप्याक मार्फत बाइनान्स र ट्रस्ट वालेटमा रकम जम्मा गर्न लगाउथे । बाइनान्स क्रिप्टो साट्ने प्लेटफर्म हो, भने ट्रस्ट वालेट क्रिप्टोकरेन्सी वालेट हो ।

रोचक कुरा त के छ भने उनीहरू विदेशी नागरिकलाई सबैभन्दा थोरै रकम लगानी गर्न लगाई त्यसबाट हुने फाइदाको रकम उनीहरूलाई नै उपलब्ध गराउथे । यस प्रक्रियामा पक्राउ परेका व्यक्तिहरूसम्म एक पटक पीडित व्यक्तिले लगानी गरेको रकम क्रिप्टोको रूपमा आइपुग्थ्यो । 

उनीहरूले प्रलोभनमा पार्न सबैभन्दा पहिले रकम थपेर पीडितको खातामा पठाइ दिन्थे । त्यसपछि रकम पाएका पीडित दङ्ग पर्थे । र, ठूलो रकम लगानी गर्न प्रेरित हुन्थे । यसरी लोभमा परेका व्यक्तिले बढी रकम पठाएको बेला पक्राउ परेका यी व्यक्तिहरू रकम रोक्का गरी सबै आफ्नोमा ट्रान्सफर गर्थे, अनि उनीहरूलाई ब्लक गर्थे । 

त्यसपछि डेटिङ एपमा पनि अकाउन्ट डिएक्टिभेट गरी नयाँ अकाउन्ट बनाएर फेरि उही शैलीमा ठगी गर्थे । यसैबिच उनीहरूले कल सेन्टर सञ्चालन गर्ने भन्दै नेपाली युवा युवतीलाई राम्रो तलबको प्रलोभन देखाएर गैरकानुनी रूपमा काममा लगाइएको भन्ने गोप्य सूचना केन्द्रीय अनुसन्धान ब्युरो (सीआईबी) लाई प्राप्त भयो । 

त्यसै आधारमा २६ भदौ २०८१ मा खटिएको प्रहरी टोलीले तीन विदेशी नागरिकसहित ५० जनालाई नियन्त्रणमा लिएको थियो । उनीहरूको साथबाट ५५ थान कम्प्युटर, १९४ थान मोबाइल, चार थान ल्यापटप, एक लाख ६२ हजार रुपैयाँ सहित विदेशी मुद्रा पनि बरामद गरिएको थियो ।

प्रारम्भिक अनुसन्धानपछि सीआईबीले घटनामा संलग्न मुख्य तीन विदेशी तथा नेपाली नागरिक कमल कँडेल सहित ३६ जनालाई प्रतिवादी बनाएको थियो । उनीहरूमाथि ‘मुलुकी अपराध संहिता, २०७४ (संशोधन सहित) परिच्छेद ७ (क) दफा २६२ (क) 'अभौतिक मुद्राको प्रयोग गर्न नहुने' सम्बन्धी कसुर अन्तर्गत मुद्दा दर्ता गरिएको थियो । 

सीआईबीले उनीहरू विरुद्ध १० करोड ३४ लाख ९३ हजार रुपैयाँसम्मको बिगो माग दाबी गरी अदालतमा मुद्दा दायर गरेको थियो । अदालतले तीन विदेशी नागरिकलाई कारागार चलान गर्ने आदेश दिएको छ भने प्रतिवादी नेपालीलाई धरौटीमा छोड्ने आदेश दिएको छ ।

पछिल्लो अध्यावधिक: मंसिर १०, २०८१ २०:५६

टिप्पणीहरू