‘फिनपोस’ मा जोडियो हाम्रो पे, अब विभिन्न शपिङ मलमा क्यूआरमार्फत भुक्तानी गर्न सकिने
फागुन २९, २०७९
काठमाडौं । हाम्रो पात्रोले सञ्चालनमा ल्याएको वालेट 'हाम्रो पे'ले फिनपोस सपोर्ट गर्ने भएको छ । योसँगै हाम्रो पात्रोको डिजिटल भुक्तानी प्लेटफर्म 'हाम्रो पे' बाट नेपालपे आबद्ध फिनपाेसमा क्यूआर स्क्यान गरेर भुक्तानी गर्न सकिनेछ ।
सिटी टेक ग्लोबलले तयार पारेको फिनपोस विभिन्न होटेल, मार्ट, शपिङ मार्टमा उपलब्ध हुन्छ । उक्त डिभाइसमा रहेको नेपाल पेको क्यूआर कोड स्क्यान गरी भुक्तानी गर्न सकिने हाम्रो पेका सीईओ शिशिर पोखरलेले जानकारी दिए । फागुन ६ गते सार्वजनिक भएको हाम्रो पेमा करिब ८० हजार प्रयोगकर्ता पुगिसकेका छन् ।
फागुन १३ गते मात्र हाम्रो पे 'नेपाल पे' क्यूआरमा आबद्ध भएको थियो । एनसीएचएलले नेसनल पेमेन्ट स्वीच अन्तर्गत नेपाल–क्यूआर स्ट्याण्डर्ड अनुसारको क्यूआर अन्तरआबद्धता कायम गर्ने गरी नेपाल पे क्यूआर सञ्चालन गरिरहेको छ । यसमा हालसम्म दुई लाख बढी मर्चेन्ट पुगिसकेको एनसीएचएलले जनाएको छ ।
पछिल्लो अध्यावधिक: फागुन २९, २०७९
